বঙাইগাঁও-মাণিকপুৰ মহকুমাৰ ১৩ পঞ্চায়ত সদস্যক বিনা প্ৰতিদ্বন্দ্বিতাৰে বিজয়ী ঘোষণা

বঙাইগাঁও সদৰ মহকুমা আৰু মাণিকপুৰ মহকুমাত অহা ৯ ডিচেম্বৰত অনুষ্ঠিত হ'বলগীয়া দ্বিতীয় পৰ্যায়ৰ পঞ্চায়ত নিৰ্বাচনৰ বাবে মহকুমা দুটাত বিভিন্ন পদত প্ৰতিদ্বন্দ্বিতা কৰিবলগীয়া প্ৰাৰ্থীৰ চূড়ান্ত তালিকা প্ৰশাসনে প্ৰকাশ কৰিছে ৷ সেই অনুসৰি মহকুমা দুটাৰ ৭টা জিলা পৰিষদ সমষ্টিৰ সদস্য পদৰ বাবে ২৯ গৰাকী, ২৮খন আঞ্চলিক পঞ্চায়তৰ সদস্য পদৰ বাবে ১০৩গৰাকী, ২৮খন গাঁও পঞ্চায়তৰ সভাপতি পদৰ বাবে ১০২ গৰাকী প্ৰাৰ্থীয়ে প্ৰতিদ্বন্দ্বিতা কৰিব ৷

সেই দৰে গাওঁ পঞ্চায়তসমূহৰ সদস্য পদৰ বাবে ৭৭২ গৰাকী বিভিন্ন ৰাজনৈতিক দল তথা নিৰ্দলীয়  প্ৰাৰ্থীয়ে প্ৰতিদ্বন্দ্বিতা কৰিব ৷ উল্লেখ্য যে মহকুমা দুটাৰ ৮খন গাঁও পঞ্চায়তৰ অন্তৰ্গত ১৩খন গাঁও পঞ্চায়ত সদস্য পদত ইতিমধ্যে ১৩ গৰাকী প্ৰাৰ্থীক বিনা প্ৰতিদ্বন্দ্বিতাৰে বিজয়ী হোৱা বুলি ঘোষণা কৰা হৈছে ৷

বিনা প্ৰতিদ্বন্দ্বিতাৰে বিজয়ী হোৱা ঘোষিত প্ৰাৰ্থীকেইগৰাকী হ'ল ৪নং বঙাইগাঁও গাঁও পঞ্চায়তৰ ১নং মেছপাৰা গাঁৱৰ সদস্য পদৰ বি পি এফ দলৰ প্ৰাৰ্থী পূৰ্ণিমা ব্ৰহ্ম, ২নং বাখাৰাপাৰা দ্বিতীয় খণ্ডৰ সদস্য পদৰ অগপ দলৰ প্ৰাৰ্থী ভূপেন ৰাজবংশী, ৫নং চিপনছিলা গাঁও পঞ্চায়তৰ ২নং ঘনদলৰ সদস্য পদৰ বিজেপি প্ৰাৰ্থী সংগীতা ৰাভা সিংহ, ৭নং উত্তৰ বইটামাৰী গাঁও পঞ্চায়তৰ ৬নং বাশবাৰী প্ৰথম খণ্ডৰ সদস্য পদৰ অগপ প্ৰাৰ্থী দিপ্তী বৰ্মন, ৮নং মূলাগাঁও গাঁও পঞ্চায়তৰ ৭নং বৰ্ষণগাঁও দ্বিতীয় খণ্ডৰ সদস্য পদৰ অগপ প্ৰাৰ্থী গীতা সূত্ৰধৰ, ১৫নং ডাংতল গাঁও পঞ্চায়তৰ ১নং তিল পুখুৰী গাঁৱৰ সদস্য পদৰ অগপ প্ৰাৰ্থী জ্যোৎস্না সূত্ৰধৰ, ৭নং গৰাইমাৰী গাঁও পঞ্চায়তৰ ৯নং জামদহা দ্বিতীয় খণ্ডৰ সদস্য পদৰ বিজেপি প্ৰাৰ্থী যতন ৰাজবংশী, ১০নং পাতিলাদহা গাঁও পঞ্চায়তৰ ৩নং পাতিলাদহা তৃতীয় খণ্ডৰ সদস্য পদৰ নিৰ্দলীয় প্ৰাৰ্থী সোণমণি ৰায় আৰু ১২নং পালেংবাৰী গাঁও পঞ্চায়তৰ ১নং পালেংবাৰী গাঁৱৰ সদস্য পদৰ নিৰ্দলীয় প্ৰাৰ্থী ভাৰতী ঠাকুৰীয়া, ২নং দক্ষিণ পালেংবাৰী গাঁৱৰ সদস্য পদৰ নিৰ্দলীয় প্ৰাৰ্থী জ্যোৎস্না দাস, ৩নং পালেংবাৰীৰ ২নং উত্তৰ খণ্ডৰ সদস্য পদৰ নিৰ্দলীয় প্ৰাৰ্থী দীপ কুমাৰ উজীৰ, ৪নং দক্ষিণ পালেংবাৰীৰ সদস্য পদৰ অগপ প্ৰাৰ্থী মিনাক্ষী ৰায় আৰু ৭নং পাটকাটা প্ৰথম খণ্ডৰ সদস্য পদৰ নিৰ্দলীয় প্ৰাৰ্থী ছায়না দাস ৷