হাতীচোং জিলা পৰিষদত অগপ-কংগ্ৰেছ-বিজেপিৰ মাজত হ'ব আৰ্কষণীয় যুঁজ 

নগাঁৱৰ পৰা ঋতুপৰ্ণ শৰ্মা
নগাঁও জিলাৰ সৰ্বমুঠ ২৯ টা জিলা পৰিষদ সমষ্টিৰ ভিতৰত অন্যতম ১০নং হাতীচোং জিলা পৰিষদ সমষ্টিত তুংগত উঠিছে অগপ, বিজেপি, কংগ্ৰেছকে ধৰি বিভিন্ন দলীয়-নিৰ্দলীয় প্ৰাৰ্থীৰ প্ৰচাৰ অভিযান। বটদ্ৰৱা বিধানসভা সমষ্টিৰ অন্তৰ্গত হাতীচোং জিলা পৰিষদত আগন্তুক নিৰ্বাচনত জিলা পৰিষদৰ সদস্য পদৰ বাবে অগপ , বিজেপি আৰু কংগ্ৰেছ দলৰ মাজত এক আৰ্কষণীয় প্ৰতিদ্বন্দ্বিতা হোৱাৰ  সম্ভাৱনা প্ৰকট হৈ পৰিছে ৷

উল্লেখ্য যে, জিলা পৰিষদ সমষ্টিটোৰ বাবে অগপ দলে অৱন্তী দেৱী , বিজেপি দলে সীমা ৰেখা ভৰালী আৰু কংগ্ৰেছ দলে কুমকুম মহন্তক প্ৰাৰ্থিত্ব প্ৰদান কৰিছে৷ইয়াৰে কংগ্ৰেছ আৰু বিজেপি দলে প্ৰক্ষেপ কৰা প্ৰাৰ্থী দুগৰাকী ৰাজনীতিৰ পথাৰত নতুন মুখ ৷ ইপিনে, আঞ্চলিক দল অগপই প্ৰাৰ্থীৰূপে প্ৰক্ষেপ কৰা অৱন্তী দেৱী হ’ল বিজেপি দলৰে টিকট বঞ্চিত জ্যেষ্ঠ নেত্ৰী৷নিজ হাতীচোং, মাজ জাজৰি, কুঁজীদাহ-জামুগুৰি, আইভেটী, ৰাইদঙীয়া, কাকমাৰী আৰু হাতীযুঁজুৱা -এই সাতখন গাঁও পঞ্চায়তক লৈ গঠিত হাতীচোং জিলা পৰিষদটো ইয়াৰ আগৰটো পঞ্চায়ত নিৰ্বাচনত অগপ দলে দখল কৰিছিল ৷ অৱশ্যে পাছত অগপৰ জিলা পৰিষদ ৰ সদস্য ৰোহিনী বৰাই  যোৱা বিধানসভা নিৰ্বাচনৰ আগে আগে বিজেপি দলত যোগদান কৰে ৷

সেই হিচাপে বৰ্তমান হাতীচোং জিলা পৰিষদ সমষ্টিটো শাসনাধিষ্ঠিত বিজেপিৰ দখলতে আছিল ৷ কিন্তু এইবাৰ সমষ্টিটো ধৰি ৰখাত তীব্ৰ প্ৰত্যাহ্বানৰ সন্মুখীন হ’ব বিজেপি দল ৷ কাৰণ অগপ দলে বিজেপিৰ প্ৰাৰ্থিত্ব কেন্দ্ৰিক বিসম্বাদৰ সম্পূৰ্ণ সুযোগ গ্ৰহণ কৰি বিজেপিৰ প্ৰাৰ্থিত্বৰ পৰা বঞ্চিত হোৱা অৱন্তী দেৱীক ৰাতিটোৰ ভিতৰতে প্ৰাৰ্থীৰূপে থিয় কৰাইছে ৷ আজি কিছুদিন পূৰ্বে এইগৰাকী অৱন্তী দেৱীকেই নিজৰ স্কুটীৰ পিছৰ আসনত বহুৱালৈ ফুৰিছিল বিধায়িকা আঙুৰলতা ডেকাই ৷

আনহাতে, কংগ্ৰেছ দলে জিলা পৰিষদত প্ৰক্ষেপ কৰা কুমকুম মহন্ত মানুহৰ মাজত বৰ্তমানলৈকে অচিনাকি মুখ যদিও আইনৰ স্নাতক প্ৰাৰ্থীগৰাকীৰ শিক্ষাগত অৰ্হতাক লৈ ৰাইজৰ মাজত এক ইতিবাচক প্ৰচাৰ দেখা গৈছে ৷ একেদৰে বিজেপিৰ প্ৰক্ষেপিত সীমাৰেখা ভৰালীও ৰাজনীতিৰ পথাৰত নতুন মুখ যদিও তেওঁ পঞ্চায়ত নিৰ্বাচনৰ দিন ঘোষণাৰ কেইদিনমান আগৰে পৰাই বহু মানুহৰ ঘৰে ঘৰে গৈ চা- চিনাকি হৈ নিজৰ প্ৰচাৰৰ দিশটো অলপ আগবঢ়াই থৈছে ৷

ইফালে গাঁও পঞ্চায়ত পৰ্যায়তো জিলা পৰিষদ সমষ্টিটোৰ অন্তৰ্গত প্ৰায় কেইখন পঞ্চায়ততে অগপ - বিজেপি আৰু কংগ্ৰেছ দলৰ মাজত তিনিকোণীয়া প্ৰতিদ্বন্দ্বিতা হোৱাৰে সম্ভাৱনা ৷ কেৱল সংখ্যালঘু বসতিপ্ৰধান হাতীযুঁজুৱা গাওঁ পঞ্চায়তত এ আই ইউ ডি এফ দলে প্ৰভাৱ বিস্তাৰ কৰাৰ সম্ভাৱনা আছে ৷ বাকী কেইখন গাঁও পঞ্চায়তৰ বৰ্তমানলৈকে সামগ্ৰিকভাৱে দেখা পোৱা নিৰ্বাচনী ছবিখনত কাকমাৰী , জামুগুৰি-কুঁজীডাহ আৰু নিজ হাতীচোং আদিত বিজেপি দল যথেষ্ট পিছপৰি ৰৈছে।