হাতীচোঙত তিনি দিনে সন্ধানহীন ব্যক্তিৰ মৃতদেহ উদ্ধাৰক লৈ চাঞ্চল্য

নগাঁৱৰ পৰা ঋতুপৰ্ণ শৰ্মা

নগাঁও জিলাৰ জাজৰি আৰক্ষী থানাৰ অন্তৰ্গত হাতীচোং সোণাৰী গাঁৱৰ পৰা বিগত তিনিদনে সন্ধানহীন হৈ থকা এজন ব্যক্তিৰ মৃতদেহ আজি পুৱা উদ্ধাৰ হোৱাক লৈ চাঞ্চল্যৰ সৃষ্টি হয় ।

প্ৰাপ্ত তথ্যমতে, গাঁওখনৰ নিৱাসী তথা তিনি সন্তানৰ পিতৃ ভূপেন বণিয়া (৪৩)ৰ মৃতদেহ আজি গাঁৱৰে এঘৰ লোকৰ বাৰীৰ পিছফালৰ এজোপা গছত চিপ লৈ থকা অৱস্থাত উদ্ধাৰ কৰে স্থানীয় লোকে ।

উৱলি যোৱা অৱস্থাত মৃতদেহটো প্ৰত্যক্ষ কৰা মাত্ৰকে এক হুৱাদুৱা পৰিস্থিতিৰ সৃষ্টি হয় গাঁওখনত । লগে লগে স্থানীয় ৰাইজে সংশ্লিষ্ট জাজৰি আৰক্ষীক খবৰ দিয়াত আৰক্ষীয়ে মৃতদেহটি উদ্ধাৰ কৰি মৰণোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামাৰিক চিকিৎসালয়লৈ প্ৰেৰণ কৰে ।

উল্লেখ্য যে বিগত কেইবামাহ ধৰি মানসিক ৰোগাক্ৰান্তৰ দৰে আচৰণ কৰি থকা ব্যক্তিগৰাকীয়ে আত্মহননৰ পথ বাছি লোৱা বুলি সন্দেহ কৰিছে স্থানীয় ৰাইজে ।