ধৰমতুলৰ ৩৭নং ৰাষ্ট্ৰীয় ঘাইপথত ভয়ানক পথ দুৰ্ঘটনা : কথমপি প্ৰাণ ৰক্ষা এটা পৰিয়ালৰ

মৰিগাঁৱৰ পৰা জিতুমণি নাথ

মৰিগাঁৱৰ বঙালধৰাত আজি ৩৭নং ৰাষ্ট্ৰীয় ঘাইপথত বাইক আৰু বেলেন'ৰ মাজত হোৱা মুখামুখি সংঘৰ্ষত বেলেন' গাড়ীখন ভস্মীভূত হয় । দুচকীয়া আৰু চাৰিচকীয়া বাহনৰৰ সংঘৰ্ষৰ ফলত ৰাষ্ট্ৰীয় ঘাইপথৰ ওপৰতে এক ভয়াৱহ অগ্নিকাণ্ডৰ সৃষ্টি হয় ।

কথমপি দুৰ্ঘটনাগ্ৰস্ত গাডীখনৰ পৰা প্ৰাণ ৰক্ষা পৰে এটা পৰিয়ালৰ । ঘটনাৰ বিৱৰণী অনুসৰি, গুৱাহাটীৰ পৰা কাৰ্বি আংলং অভিমুখী এ এছ-০৯ এফ-৩৫২১ নম্বৰৰ বেলেন' গাড়ীখন ভুৱন খৰচাং নামৰ চালকজনে চলাই আহি থকাৰ সময়তে মৰিগাঁও জিলাৰ ধৰমতুল আৰক্ষী থানাৰ বঙালধৰা তিনিআলিত এ এছ-০২ এম-৯৪৮২ নম্বৰৰ বাইকেৰে আৰোহী ফাইজুল হক পাৰ হ'বলৈ চেষ্টা কৰোঁতেই প্ৰচণ্ড  জোৰেৰে খুন্দা মাৰে নগাঁও অভিমুখী বিলাসী বাহনখনে ।

ফলত বাইক আৰোহীজন গুৰুতৰভাৱে আহত হয় । স্থানীয় ৰাইজৰ মতে, বাইক আৰোহীজনৰ ভুলৰ বাবেই এই ভয়াৱহ দুৰ্ঘটনাটো সংঘটিত হ'বলৈ পালে ৷ ইফালে দুৰ্ঘটনাটো সংঘটিত হোৱাৰ পাছতেই দপদপাই পথৰ ওপৰতে জ্বলি উঠে বিলাসী গাড়ীখন ।

এই ভয়াৱহ দুৰ্ঘটনাটোৰ মাজতেই কথমপি প্ৰাণ লৈ গাড়ী ভিতৰৰ পৰা ওলাই আহিবলৈ সক্ষম হয় ভুৱন খৰচাঙৰ পৰিয়ালটো । পিছত আৰক্ষী আৰু অগ্নিনিৰ্বাপক বাহিনী উপস্থিত হৈ জুই নুমুওৱাৰ লগতে আহত লোককেইজনক চিকিৎসালয়লৈ প্ৰেৰণ কৰে ।

উল্লেখ্য যে এই ভয়াৱহ দুঘটনাটোত  অগ্নিদগ্ধ হোৱাৰ পৰা ৰক্ষা পৰে পৰিয়ালটো ।