ভেজাল পেট্ৰ'ল উদ্ধাৰ হোৱাক লৈ উত্তাল সোণাৰি  

সোণাৰিৰ পৰা ঘন বৰা

চৰাইদেউ জিলাৰ সোণাৰিত অব্যাহত আছে ভেজাল পেট্ৰ'লৰ ৰমৰমীয়া ব্যৱসায় । সোণাৰিৰ একাংশ পেট্ৰ’ল-ডিজেল পাম্পত কম মূল্যৰ ইন্ধন এবিধ ব্যৱহাৰ কৰি ভেজাল পেট্ৰ'লৰ ব্যৱসায় ৰমৰমীয়া ব্যৱসায় চলাই থকাৰ তথ্য পুনৰ পোহৰলৈ আহিছে । জানিব পৰা মতে, একাংশ অসাধু ব্যৱসায়ীয়ে ভেজাল ইন্ধনৰ ব্যৱসায় কৰি লাখ লাখ টকা লুটি থকাৰ পাছতো বিভাগীয় কৰ্তৃপক্ষই গুৰুত্ব নিদিয়াত সচেতন ৰাইজৰ মাজত প্ৰতিক্ৰিয়া সৃষ্টি হৈছে ।

আনহাতে সোণাৰিৰ নেম চাণ্ড এণ্ড মাণিক চাণ্ড নামৰ তেল ডিপোত কৰ্মৰত একাংশ কৰ্মচাৰীয়ে গ্ৰাহকক ভেজাল পেট্ৰ'ল বিক্ৰী কৰি থকাৰ অভিযোগ উত্থাপন হোৱাৰ লগতে পেট্ৰ’ল ডিপোটোত আজি গ্ৰাহকে উত্তপ্ত পৰিস্থিতিৰ সৃষ্টি কৰে। উল্লেখ্য যে এজন গ্ৰাহকে স্কুটীত তেল ডিপোটোৰ পৰা তেল ভৰাওতে ভেজাল পেট্ৰ'ল বিক্ৰী কৰা তথ্য পোহৰলৈ আহে । ফলত ডিপোটোৰ কৰ্মচাৰীৰ লগত তৰ্কাতৰ্কি লাগি গ্ৰাহকক বনিয়াই মাৰপিট কৰে ।