কৃত্ৰিম বানৰ কবলত বঙাইগাঁৱৰ ঔদ্যোগিক প্রশিক্ষণ প্রতিষ্ঠান

চাপৰৰ পৰা ইমৰান  আলম খান
পশ্চিম অসমৰ বাণিজ্যিক প্রাণকেন্দ্র বঙাইগাঁও চহৰৰ মাজমজিয়াত অৱস্থিত ঔদ্যোগিক প্রশিক্ষণ প্রতিষ্ঠানটোৰ চাৰিওফালে পানী জমা হোৱাৰ ফলত ব্যাহত হৈ পৰিছে প্রতিষ্ঠানটোত অধ্যায়নৰত প্রায় ৪ শতাধিক ছাত্র-ছাত্রীৰ শিক্ষাৰ যাতায়াত ব্যৱস্থা ।

যোৱা ছেপ্টেম্বৰৰ পৰা আৰম্ভ হোৱা এছ চি ভি ,টি আৰু এন চি ভি টি পৰীক্ষাত অৱতীৰ্ণ হোৱা ছাত্র-ছাত্রীসকলে বহু কষ্ট কৰি পৰীক্ষা গৃহত উপস্থিত হয় ৷ এনেকি প্রতিষ্ঠানটোৰ শিক্ষক-শিক্ষয়ীত্রী আৰু কৰ্মচাৰীসকলেও জোতা-চেণ্ডেল হাতত লৈ এক আঁঠু পানীৰ মাজেৰে খোজকাঢ়ি আহি প্রৱেশ কৰে প্রতিষ্ঠানটোৰ মূল দুৱাৰত ।

কোনোবাই আকৌ আঁঠুলৈকে প্লাষ্টিক বান্ধিও পাৰ হয় । পানীৰ তলত থকা ইটাৰ টুকুৰা আৰু গাঁতেৰে পৰিপূৰ্ণ বাটটোত অহা-যোৱা কৰিব লাগে খুব সাৱধানে । বিশেষকৈ ছাত্র-ছাত্রীসকলৰ অহা-যোৱাৰ অসুবিধায়ো গা লৰাব পৰা নাই কৰ্ত্তৃপক্ষৰ ।

সকলোৱে যেন সমস্যা সমাধান নহ'ব বুলিয়েই ভাবে । ইফালে এনে পৰিস্থিতি হোৱাৰ মূল কাৰণ জানিবলৈ আমাৰ সাংবাদিকে লগ ধৰিছিল আই টি আইৰ অধ্যক্ষ আৰু কৰ্মচাৰীসকলক ৷

তেওঁলোকে জানিবলৈ দিয়া মতে, প্রতিষ্ঠানৰ দক্ষিণফালে থকা বঙাইগাঁও মহাবিদ্যালয়লৈ যোৱা পকী বাটটোত হেনো পূৰ্বতে এটা কালভাৰ্ট আছিল ৷ সেই কালভাৰ্টটো বন্ধ হৈ যোৱাত আই টি আই আৰু জিলা পুথিভঁৰালটো পানীত জাহাজৰ নিচিনাকৈ ওপঙি আছে ।

বিষয়টো যোৱা ২৭ ছেপ্টেম্বৰৰ দিনা অধ্যক্ষই জিলাধিপতিক জনোৱা বুলিও আমাক অৱগত কৰে । এনেহেন পৰিস্থিতিৰ মাজত বিদ্যু‌ৎ সৰবৰাহৰ ক্ষেত্রত দেখা দিয়া জটিলতাই বাৰুকৈয়ে ভোগাইছে চলিত পৰীক্ষাৰ পৰীক্ষাৰ্থীসকলক ।

বিদ্যুৎ বিভাগৰ অৱহেলাৰ বাবে যোৱা ২৮ ছেপ্টেম্বৰত অনুষ্ঠিত হ'বলগা পুৱাৰ পৰীক্ষা সময়মতে পাতিবই নোৱাৰিলে আই টি আই কৰ্ত্তৃপক্ষই ।