ৰঙিয়াত প্ৰৱঞ্চক আটক

নিবনুৱা যুৱক-যুৱতীসকলে উচ্চ শিক্ষা গ্ৰহণ কৰি কৰ্মসংস্থাপন বিচাৰি হাবাথুৰি খাবলগীয়া হৈছে । বৰ্তমান ৰে'ল বিভাগৰ পৰীক্ষা চলি থকাৰ সময়ত ৰে'ল বিভাগত চাকৰি দিয়াৰ প্ৰলোভন দি লাখ লাখ টকা আত্মসাৎ কৰা এজন প্ৰৱঞ্চকক আজি ৰে'ল আৰক্ষীয়ে ৰঙিয়া ৰে'ল ষ্টেচনত কৰায়ত্ত কৰিবলৈ সক্ষম হয় ।

ধেমাজি জিলাৰ হীৰকজ্যোতি সোণোৱাল নামৰ এজন যুৱকে ৰে'ল বিভাগত চাকৰি দিয়াৰ প্ৰলোভন দি ৫০জন যুৱক-যুৱতীৰ পৰা ধন লৈ ধেমাজিৰ পৰা বাহিৰলৈ পলাই যোৱাৰ পৰিকল্পনা কৰিছিল ।

আজি যুৱকজন ৰঙিয়া ৰে'ল ষ্টেচনত ৰে'লৰ বাবে অপেক্ষা কৰি থাকোঁতে ধেমাজিৰ ভুক্তভোগী ব্যক্তি এজনে দেখা পাই ৰে'ল আৰক্ষীক কথাটো অৱগত কৰে ।

ৰে'ল আৰক্ষীয়ে লগে লগে অভিযান চলাই যুৱকজনক কৰায়ত্ত কৰিবলৈ সক্ষম হয় ।

বৰ্তমান যুৱকজনক ৰে'ল আৰক্ষীয়ে অধিক তথ্য জনাৰ বাবে সোধ-পোছ কৰি আছে ।