নলবাৰী সমষ্টিৰ খাতিকুছিত শতাধিক কংগ্ৰেছ আৰু অগপ নেতা-কৰ্মীৰ বিজেপিত যোগদান

দ্বিজেন ডেকা,ঘগ্ৰাপাৰ:

নলবাৰীৰ বিধায়ক অশোক শৰ্মাৰ নেতৃত্বত দেওবাৰে সমষ্টিটোৰ অন্তৰ্গত খাতিকুছিত শতাধিক কংগ্ৰেছ আৰু অগপ দলৰ নেতা-কৰ্মীয়ে আনুষ্ঠানিকভাৱে বিজেপিত যোগদান কৰে।বড়িগোগ বনভাগ মণ্ডল বিজেপিৰ উদ‍্যোগত ভিঠামহল আৰু অৰৰা বুথ সমিতিৰ সহযোগত আয়োজিত দুখন সভাত কংগ্ৰেছ আৰু অগপ কৰ্মীসকলে বিজেপিৰ নীতি আৰু আদৰ্শৰ প্ৰতি আকৃষ্ট হৈ দলটোত যোগদান কৰে।বিজেপি নেতা যোগেশ কলিতাৰ সভাপতিত্বত অনুষ্ঠিত যোগদান সভা দুখনত ভিঠামহলৰ অগপৰ খাতিকুছি আঞ্চলিক মহিলা পৰিষদৰ সভানেত্ৰী কবিতা কলিতাৰ নেতৃত্বত প্ৰায় ২৫ গৰাকী অগপ কৰ্মী আৰু পাঁচ গৰাকী কংগ্ৰেছ দলৰ সক্ৰিয় কৰ্মীয়ে বিজেপিত যোগদান কৰে।আনহাতে,কংগ্ৰেছৰ ভোট বেংক হিচাপে পৰিচিত অৰৰাত নলবাৰী সমষ্টিৰ যুৱ কংগ্ৰেছৰ সাধাৰণ সম্পাদক আমিনুৰ ৰহমানৰ নেতৃত্বত ৭০ জনকৈও অধিক কংগ্ৰেছ নেতা-কৰ্মীয়ে বিজেপিৰ কাম -কাজত সন্তুষ্ট হৈ যোগদান কৰে।দেওবাৰৰ এই যোগদান কাৰ্যসূচীত নলবাৰীৰ বিধায়ক অশোক শৰ্মা, বড়িগোগ বনভাগ মণ্ডল বিজেপিৰ সভাপতি ডিম্বেশ্বৰ বেজবৰুৱা,নলবাৰী জিলা বিজেপিৰ সাধাৰণ সম্পাদিকা পদ্মা ৰামচিয়াৰী,সম্পাদক দিপেন কলিতা,নলবাৰী জিলা পৰিষদৰ সভাপতি নিতুল ডেকা,বড়িগোগ বনভাগ মণ্ডল বিজেপিৰ প্ৰাক্তন সভাপতি মৃদুল কলিতা,সাধাৰণ সম্পাদক চন্দন ডেকা, আল্লিয়া জিলা পৰিষদীয় সমষ্টিৰ সদস‍্যা মাধৱী ৰাজবংশীয়ে সদ‍্য যোগদানকাৰীসকলক আদৰণি জনায়।বিজেপি নেতা হিতেশ ব্ৰহ্ম আৰু অঞ্জন শৰ্মাৰ পৰিচালনা আৰু বিধায়ক অশোক শৰ্মাৰ নেতৃত্বত দেওবাৰে অনুষ্ঠিত যোগদান কাৰ্যসূচীয়ে সমষ্টিটোত বিজেপিৰ ভেটি আগন্তুক দিনত অধিক মজবুত কৰিব বুলি তৃণমূল কৰ্মীসকলে আশা প্ৰকাশ কৰিছে। ইফালে,বিধায়কগৰাকীয়ে খাতিকুছি গাঁও পঞ্চায়তত চতুৰ্দশ বিত্তীয় আয়োগৰ অনুমোদিত ধনেৰে নিৰ্মাণ হ'বলগীয়া দুখন আঁচনিৰ আধাৰশিলা স্থাপন কৰে আৰু এখন ৰাজহুৱা  মঞ্চও মুকলি কৰে।