পুৰণিগুদামৰ আৰক্ষী বিষয়া বাবুল বৰাৰ মৃত্যুত শোকৰ ছাঁ 

নগাঁৱৰ পৰা ঋতু পৰ্ণ শৰ্মা:

নগাঁও জিলাৰ পুৰণিগুদাম আৰক্ষী চকীত কিছুদিন পূৰ্বলৈকে কৰ্মৰত সহকাৰী উপ পৰিদৰ্শক বাবুল বৰা(৫০)ৰ বৃহস্পতিবাৰে নিশা মৃত্যু হয়।দীৰ্ঘদিন ধৰি শাৰীৰিক অসুস্থতাত ভুগি থকা কৰৈয়নী হেঙুলীচুকৰ নিবাসী আৰক্ষী বিষয়া বাবুল বৰা হঠাৎ গুৰুতৰভাৱে অসুস্থ হৈ পৰাত তেওঁঁক গুৱাহাটীৰ এখন ব্যক্তিগত চিকিৎসালয়ত ভৰ্তি কৰোৱা হৈছিল যদিও নিশা চিকিৎসাধীন অৱস্থাতে তেওঁৰ মৃত্যু হয়।২০১৫ চনৰ অক্টোবৰৰ পৰা জিলাখনৰ পুৰণিগুদাম আৰক্ষী চকীত সহকাৰী উপ-পৰিদৰ্শক হিচাপে সততা আৰু নিষ্ঠাৰে সেৱা আগবঢ়াই অহা বাবুল বৰাক শেহতীয়াকৈ শিলঘাট আৰক্ষী চকীলৈ বদলি কৰা হৈছিল যদিও শিলঘাট আৰক্ষী চকীত যোগদান কৰাৰ পূৰ্বেই তেওঁঁৰ মৃত্যু হয়।ঐতিহ্যমণ্ডিত পুৰণিগুদাম অঞ্চলত এগৰাকী আৰক্ষী বিষয়া হিচাপে বাবুল বৰাই বহু প্ৰত্যাহবানৰ সন্মুখীন হৈও বিগত দিনসমূহত সুচাৰুৰূপে দায়িত্ব পালন কৰিবলৈ সক্ষম হৈছিল।এগৰাকী আৰক্ষী বিষয়া হিচাপে পুৰণিগুদামবাসী ৰাইজৰ মাজত অতিকৈ সমাদৰ লাভ কৰিবলৈ সক্ষম হোৱা বাবুল বৰাৰ মৃত্যুৰ খবৰ বিয়পি পৰাৰ লগে লগে সমগ্ৰ পুৰণিগুদাম অঞ্চলত শোকৰ ছাঁ পৰে।।আৰক্ষী বিষয়া বৰাৰ মৃত্যুত পুৰণিগুদাম বাপুজী ভৱন,পুৰণিগুদাম আঞ্জুমান-ই-ইছলামীয়া,পুৰণিগুদাম আঞ্চলিক ছাত্ৰ সন্থা,পুৰণিগুদাম প্ৰেছ ক্লাব,চামগুৰি ইলেকট্ৰনিক মিডিয়া এছ'চিয়েচন,নগাঁও জিলা বাৰ্তাজীৱী সংঘ,অখিল ভাৰতীয় বিদ্যাৰ্থী পৰিষদৰ পুৰণিগুদাম শাখা,অসম জাতীয়তাবাদী যুৱ-ছাত্ৰ পৰিষদৰ পুৰণিগুদাম আঞ্চলিক,নগাঁও জিলা আৰক্ষী-প্ৰশাসন,কলিয়াবৰ মহকুমা আৰক্ষী বিষয়া মৃন্ময় দাস,চামগুৰি আৰক্ষী থানা,পুৰণিগুদাম আৰক্ষী চকীৰ ভাৰপ্ৰাপ্ত আৰক্ষী বিষয়া বিৰদাও গয়াৰীৰ লগতে সমূহ আৰক্ষী,আৰক্ষী পৰিদৰ্শক সোমেশ্বৰ কোঁৱৰ,আৰক্ষী উপ-পৰিদৰ্শক শিলচৰত কৰ্মৰত ৰাজীৱ বৰ্মন,নলবাৰীত কৰ্মৰত বংশীধৰ কুমাৰ,আমচৈত কৰ্মৰত অনিল দাস,অংগাভিনয় অসম,'জুৱা'ৰ কলিয়াবৰ জিলা সমিতি,সংযুক্ত সাংবাদিক সংস্থা চামগুৰি,দৃষ্টি ফাউণ্ডেশ্যন,পুৰণিগুদামৰ ক্ষুদ্ৰ ব্যৱসায়ীসকল,চামগুৰি আঞ্চলিক ছাত্ৰ সন্থা,যুৱ-ছাত্ৰ পৰিষদৰ চলচলি শাখাকে আদি কৰি বিভিন্ন অনুষ্ঠান-প্ৰতিষ্ঠানে গভীৰ শোক প্ৰকাশ কৰি বিদেহ আত্মাৰ সদগতি কামনা কৰে।উল্লেখযোগ্য যে মৃত্যুৰ সময়ত আৰক্ষী বিষয়া বাবুল বৰাই মাতৃৰ উপৰি পত্নী,দুগৰাকী জীয়াৰীসহ বহু আত্মীয়-স্বজনক ইহ সংসাৰত এৰি থৈ যায়।