ধুবুৰীত প্ৰাক্তন প্ৰধান মন্ত্ৰী অটল বিহাৰী বাজপেয়ীলৈ শ্ৰদ্ধাঞ্জলি

প্ৰাক্তন প্ৰধান মন্ত্ৰী অটল বিহাৰী বাজপেয়ীৰ মৃত্যুৰ বাতৰিয়ে শোকস্তব্ধ কৰি তুলিছে সকলোকে । দেশৰ লগতে ৰাজ্যখনৰ প্ৰতিটো প্ৰান্ততে ৰাজহুৱাকৈ শ্ৰদ্ধাঞ্জলি অনুষ্ঠানৰ আয়োজন কৰা পৰিলক্ষিত হৈছে ।

একেদৰে ধুবুৰী চহৰৰ ভিন্ন এলেকাতো ৰাজহুৱাকৈ আয়োজন কৰা হয় শ্ৰদ্ধাঞ্জলি অনুষ্ঠানৰ । সন্ধিয়াৰ ভাগত মমবাতি জ্বলাই, বন্তি প্ৰজ্জ্বালনেৰে প্ৰাক্তন প্ৰধান মন্ত্ৰীগৰাকীলৈ শ্ৰদ্ধাঞ্জলি নিবেদন কৰে বিভিন্নজনে ।

আনহাতে, সন্ধিয়া ৭.৩০মান বজাত ধুবুৰী চহৰৰ চ'ক বজাৰৰ পৰা বিশাল শোভাযাত্ৰা উলিওৱা হয় । বিভিন্ন সংগঠনৰ সহযোগত প্ৰায় সহস্ৰাধিক ৰাইজে হাতে হাতে মমবাতি লৈ শোভাযাত্ৰাত অংশগ্ৰহণ কৰা পৰিলক্ষিত হয় ।

শোভাযাত্ৰাত আবাল-বৃদ্ধ-বণিতা সকলোৱে অংশগ্ৰহণ কৰে ।