বঙাইগাঁৱত মহিলাক বলাৎকাৰৰ অপচেষ্টা, লম্পট যুৱক কৰায়ত্ত

বঙাইগাঁও চহৰৰ উত্তৰ বঙাইগাঁৱৰ কদমতলিত আজি পুৱা এগৰাকী বিবাহিতা মহিলাক ধৰ্ষণৰ অপচেষ্টা চলোৱা লম্পট যুৱক এজনক স্থানীয় ৰাইজে কৰায়ত্ত কৰি আৰক্ষীক গতাই দিয়ে ৷

ধৃত লম্পট যুৱকজন জিলাখনৰ অভয়াপুৰী থানাৰ অন্তৰ্গত ডুমেৰগুৰীৰ ইমান আলীৰ পুত্ৰ নাজিৰ হুছেইন (২৪) বুলি জানিব পৰা গৈছে ৷ নাজিৰ হুছেইনে কদমতলিৰ এঘৰ লোকৰ গৃহত ভাৰাতীয়া হিচাপে থাকি বঙাইগাঁও চহৰত টেম্পো চলায় ৷

উল্লেখ্য যে পুৱা ৭মান বজাত একেটা অঞ্চলতে থকা বিবাহিতা মহিলাগৰাকীৰ ঘৰত স্বামী নথকা অৱস্থাত যুৱকজনে মহিলাগৰাকীৰ কোঠাৰ পিছফালৰ বেৰ কাটি ভিতৰত প্ৰৱেশ কৰে আৰু ধৰ্ষণৰ চেষ্টা চলায় ৷

এনে অৱস্থাত মহিলাগৰাকীয়ে চিঞৰ-বাখৰ কৰাত ওচৰ-চুবুৰীয়াসকলে আহি লম্পটজনক কৰায়ত্ত কৰে ৷ স্থানীয় ৰাইজে যুৱকজনক কিছু উত্তম-মধ্যম শোধোৱাৰ লগতে বান্ধি থৈ আৰক্ষীক খবৰ দিয়ে ৷

পিছত ঘটনাস্থলীত আৰক্ষী উপস্থিত হোৱাত যুৱকজনক আৰক্ষীৰ হাতত গতাই দিয়ে ৷ ইপিনে ঘটনা সন্দৰ্ভত মহিলাগৰাকীয়ে যুৱকজনৰ বিৰুদ্ধে বঙাইগাঁও সদৰ থানাত এজাহাৰ দাখিল কৰাত আৰক্ষীয়ে ৬৫৯/১৮ (ইউ এছ ৪৫৪/ ৩৭৬/৫১১ আই পি চি) নম্বৰৰ এক গোচৰ পঞ্জীয়ন কৰি যুৱকজনক গ্ৰেপ্তাৰ কৰে ৷

পিছত যুৱকজনক আৰক্ষীয়ে বঙাইগাঁও আদালতত হাজিৰ কৰাত আদালতে নাজিৰ হুছেইনক জে'ল হাজোতলৈ প্ৰেৰণ কৰে ৷