পাকিস্তানৰ নিৰ্বাচনঃ মুছলিম অধ্যুষিত অঞ্চলত ৩গৰাকী হিন্দু প্ৰাৰ্থীৰ জয়লাভ

পাকিস্তান পিপ’লছ পাৰ্টী (পি পি পি)ৰ ৩গৰাকী হিন্দু প্ৰাৰ্থী মুছলিম অধ্যুষিত অঞ্চলৰ সিন্ধু প্ৰদেশৰ পৰা জয়লাভ কৰা ঘটনাই বাতৰিৰ শিৰোনাম দখল কৰিছে৷

উল্লেখ্য যে পাকিস্তানৰ সিন্ধু প্ৰদেশখন হ’ল সৰহসংখ্যক মুছলমান বসতিপ্ৰধান এলেকা৷ যোৱা ২৫ জুলাইত ঘোষিত নিৰ্বাচনী ফলাফলত ইয়াৰ পৰা ৩গৰাকীকৈ হিন্দু প্ৰাৰ্থী জয়লাভ কৰা ঘটনাটো এক উল্লেখযোগ্য ঘটনা হিচাপে পৰিগণিত হৈছে৷

প্ৰদেশখনৰ থাৰপাৰকাৰ সমষ্টিৰ পৰা মহেশ মালানি নেচনেল এছেম্বলীলৈ নিৰ্বাচিত হৈছে৷ তেওঁৰ উপৰি হৰিৰাম কিৱাৰীলাল আৰু জামচোৰোৰ গিয়ানো মাল ওৰফে জ্ঞানচান্দ ইচৰানীয়ে প্ৰভিন্সিয়েল এছেম্বলীৰ পি এছ-১৪৭ আৰু পি এছ-৮১ৰ আসনকেইখনত জয়লাভ কৰে৷

আনহাতে, তিনিওজন প্ৰাৰ্থীয়ে পাকিস্তানৰ অসংৰক্ষিত আসনৰ পৰা নিৰ্বাচন খেলি জয়যুক্ত হোৱা প্ৰথম অনা-মুছলমান হিচাপে পৰিগণিত হৈছে৷ পাকিস্তানৰ হিন্দু সংগঠনবোৰে তিনিওগৰাকীকে শুভেচ্ছা জ্ঞাপন কৰিছে৷ চৰকাৰী তথ্যমতে, পাকিস্তানত ৭৫ লাখ হিন্দু লোকে বাস কৰা বুলি কোৱোৰ বিপৰীতে হিন্দু সম্প্ৰদায়ে তাত প্ৰায় ৯০ লাখ লোক বসবাস কৰি আছে বুলি দাবী কৰে৷