সৰুক্ষেত্ৰী সমষ্টিত শান্তিপূৰ্ণভাৱে চলিছে ভোট গ্ৰহণ

চেঙাৰ পৰা সুৰজিৎ পাঠক

সৰুক্ষেত্ৰী সমষ্টিৰ ১৫নং দক্ষিণ-পূব সৰুক্ষেত্ৰী গাঁও পঞ্চায়তৰ সমূহ ভোটগ্ৰহণ কেন্দ্ৰত শান্তিপূৰ্ণভাবে চলি আছে ভোটগ্ৰহণ । পুৱা ৭ বজাৰ পৰা আৰম্ভ হোৱা ভোটদান পৰ্বত দেখা গৈছে দীঘলীয়া শাৰী ।

পুৰুষ-মহিলা সমানেই ওলাই আহিছে ভোটাধিকাৰ সাব্যস্ত কৰিবলৈ । প্ৰতিটো ভোটকেন্দ্ৰত প্ৰাৰ্থীসকল উপস্থিত হৈ বুজ লৈছে পৰিস্থিতিৰ । ১৫নং দক্ষিণ-পূব সৰুক্ষেত্ৰী গাঁও পঞ্চায়তৰ ১০নং ৱাৰ্ডৰ মাজদিয়া হাইস্কুল ভোটগ্ৰহণ কেন্দ্ৰত এনেদৰে দেখা গ'ল আঞ্চলিক সদস্য পদৰ দুই প্ৰাৰ্থী ক্ৰমে বিজেপি দলৰ মনোনীত প্ৰাৰ্থী আয়ন আহমেদ আৰু অগপ দলৰ মনোনীত প্ৰাৰ্থী পানীৰাম বসুমতাৰীক ।

কেন্দ্ৰটোত জিলা পৰিষদৰ কংগ্ৰেছৰ প্ৰাৰ্থী বাবুল আলী, নিৰ্দলীয় প্ৰাৰ্থী মুক্তাৰ উদ্দিন আহমেদ, কংগ্ৰেছৰ  সভানেত্ৰী পদৰ প্ৰাৰ্থী জেচমিনা চুলতানা, অগপৰ সভানেত্ৰী পদৰ প্ৰাৰ্থী অপ্সৰা বেগম, কংগ্ৰেছৰ আঞ্চলিক সদস্য পদৰ প্ৰাৰ্থী ইমৰাণ আলী উপস্থিত হৈ পৰিস্থিতিৰ বুজ লোৱা দেখা যায় । আনহাতে, মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া ডিম্বেশ্বৰ পাঠকৰ নেতৃত্বত এটি আৰক্ষীৰ দলে প্ৰতিটো কেন্দ্ৰকে পৰ্যবেক্ষণ কৰি আছে ।