বৰপেটাৰোড শাখা সত্ৰত সাংসদ বিশ্বজিৎ দৈমাৰীৰ শংকৰদেৱৰ অমৃত বাণী

জগৎ গুৰু শ্ৰীমন্ত শংকৰদেৱৰ ৫৭০সংখ্যক আৱিৰ্ভাৱ মহোৎসৱ তিনিদিনীয়াকৈ পালন কৰি থকা বৰপেটাৰোড শাখা সত্ৰত আজি শেষৰ দিনাৰ এক বিশেষ অনুষ্ঠানত অংশগ্ৰহণ কৰে ৰাজ্যসভাৰ সাংসদ বিশ্বজিৎ দৈমাৰীয়ে ৷

বৰপেটাৰোড শাখা সত্ৰ পৰিচালনা সমিতিৰ সভাপতি ধনেশ্বৰ নাথৰ সভাপতিত্বত অনুষ্ঠিত এক অনুষ্ঠানত সাংসদ বিশ্বজিৎ দৈমাৰীক আদৰণি জনোৱা হয় ৷ অনুষ্ঠানত সাংসদ  দৈমাৰীয়ে কয়- মহাপুৰুষ শ্ৰীমন্ত শংকৰদেৱেই সমগ্র বিশ্বত একমাত্র ধৰ্মগুৰু, যিয়ে সাহিত্যৰ কাণ্ডাৰী হোৱাৰ লগতে কৃষ্টি-কলাৰো গুৰুৰূপে বন্দিত হৈছে ।

গুৰুজনা একাধাৰে শাস্ত্রজ্ঞ, তত্ত্বজ্ঞ, বিদগ্ধ পণ্ডিত ৷ একক আৰু অদ্বিতীয় হিচাপে সর্বশ্রেষ্ঠ প্রতিপন্ন কৰি থৈ গৈছে । সেইবাবেই গুৰুজনাক ‘সর্ব গুণাকৰ’ৰূপে জনা যায় । মহাপুৰুষ শ্ৰীমন্ত শঙ্কৰদেৱৰ অসাধাৰণ আৰু অফুৰন্ত প্রতিভাৰাজি বিশ্বৰ ভিতৰতে অন্যতম ।

যেনেদৰে অন্তর্যামী শ্রীকৃষ্ণৰ কথা কৈ অন্ত কৰিব নোৱাৰি, ঠিক তেনেকৈ জগতগুৰু শ্ৰীমন্ত শঙ্কৰদেৱৰ প্ৰতিভাৰ কথা কৈ শেষ কৰিব নোৱাৰি । তেওঁ লগতে আক্ষেপ কৰি কয়- গুৰুজনাই আমাক বহু দি গ’ল যদিও তেখেতক কিন্তু আমি বিশ্বৰ দৰবাৰত যিদৰে প্ৰতিষ্ঠা কৰিব লাগিছিল সেইদৰে কৰিব পৰা নাই ৷

অইন ধৰ্মৰ প্ৰৱৰ্তকসকলক যিদৰে সমগ্ৰ বিশ্ববাসীয়ে জানে, তাৰ তুলনাত মহাপুৰুষজনাক বহু কমসংখ্যক বিশ্বৰ লোকে জানে বুলি কোৱা কথাষাৰ অপ্ৰিয় হ'লেও সত্য ৷ সেয়ে আমি জগৎ গুৰুজনাৰ কৰ্মৰাজি আৰু এক শৰণ নামধৰ্মৰ বিষয়ে প্ৰচাৰ আৰু প্ৰসাৰত আৰু অধিক মনোনিবেশ কৰাটো উচিত ৷

নৱপ্ৰজন্মই যাতে মহাপুৰুষ শ্ৰীমন্ত শংকৰদেৱৰ বিষয়ে ছাত্ৰাৱস্থাৰ পৰাই বিশদভাৱে অধ্যয়ন কৰিব পাৰে তাৰবাবে মেট্ৰিকলৈ নহ'লেও অন্ততঃ নৱম শ্ৰেণীলৈকে গুৰুজনাৰ ওপৰত ১০/২৫ নম্বৰৰ প্ৰশ্ন ৰখাটো বাধ্যতামূলক কৰিব লাগে বুলিও সাংসদ দৈমাৰীয়ে মন্তব্য কৰে ৷