বিশ্বনাথ চাৰিআলি ৰাজহুৱা শ্মশানত পানী যোগান প্ৰকল্প উদ্বোধন

ৰাইজৰ এক দীৰ্ঘদিনীয়া সমস্যাৰ অন্ত পেলাই আজি বিশ্বনাথ চাৰিআলি নগৰৰ ৬নং ৱাৰ্ডত অৱস্থিত ৰাজহুৱা শ্মশানত ভ্ৰাম্যমাণ পানী যোগান প্ৰকল্পৰ শুভ উদ্বোধন কৰে পৌৰপতি ৰুলী শৰ্মাই ।

কোনোধৰণৰ ৰাজসাহায্য অবিহনে লক্ষাধিক টকা ব্যয়সাপেক্ষে সম্পূৰ্ণ কৰা এই প্ৰকল্পৰ সমুদায় খৰচ বহন কৰে বিশিষ্ট সমাজকৰ্মী, প্ৰতিষ্ঠিত উদ্যোগী নৰেন শৰ্মাই ।

ভ্ৰাম্যমাণ পানী যোগান প্ৰকল্পটোৰ শুভাৰম্ভ কাৰ্যসূচীৰ লগত সংগতি ৰাখি আয়োজন কৰা এক গাম্ভীৰ্যপূৰ্ণ অনুষ্ঠানত বিশ্বনাথ চাৰিআলি পৌৰসভাৰ তৰফৰ পৰা প্ৰকল্পটোৰ দাতাগৰাকীক সম্বৰ্ধনা জ্ঞাপন কৰা হয় ।

নিজৰ চমু ভাষণত সমাজকৰ্মীগৰাকীয়ে দুভৰিত শক্তি থকালৈকে সমাজৰ উন্নয়নৰ হকে যথাসাধ্য সেৱা আগবঢ়াই যোৱাৰ প্ৰতিশ্ৰুতি প্ৰদান কৰে । তেওঁ নৱপ্ৰজন্মক সময় অপচয় নকৰি কঠোৰ পৰিশ্ৰম কৰিবলৈ আহ্বান জনোৱাৰ লগতে তেওঁৰ ব্যক্তিগত জীৱনত সময়ৰ সদ্ব্যৱহাৰেই তেওঁৰ সফলতাৰ মূলমন্ত্ৰ বুলিও উল্লেখ কৰে ।

পৌৰপতি ৰুলী শৰ্মাই পৌৰসভাৰ অধীনস্থ ৰাজহুৱা শ্মশানখনৰ দীৰ্ঘদিনীয়া অভাৱ দূৰ কৰাৰ বাবে উদ্যোগী নৰেন শৰ্মাক কৃতজ্ঞতা জনোৱাৰ লগতে তেওঁৰ সু-স্বাস্থ্য আৰু দীৰ্ঘায়ু কামনা কৰে ।

নৰেন শৰ্মাৰ দৰে সময়ৰ সদ্ব্যৱহাৰ কৰিব জনা লোক সমাজত বিৰল বুলি উল্লেখ কৰি পৌৰপতিগৰাকীয়ে তেওঁৰ দৰে প্ৰচাৰ বিমুখ, কঠোৰ পৰিশ্ৰমী আৰু উদাৰ ব্যক্তি সমাজৰ বাবে আদৰ্শস্বৰূপ বুলি উল্লেখ কৰে ।

পৌৰসভাৰ কৰ্মচাৰী ভাস্কৰজ্যোতি বৰাই আঁতধৰা অনুষ্ঠানটোত ৱাৰ্ড কমিছনাৰ ৰীতা মহন্ত, ৰূপক দাস গুপ্ত, বিমান শইকীয়া, মাধৱী সৰকাৰ, আচমা চুলতানা, তাপসী সাহা, জ্যেষ্ঠ কৰ্মচাৰী প্ৰদীপ শইকীয়া, ৰাতুল শৰ্মা, পবিত্ৰ বৰুৱা, ভুপেন কলিতা প্ৰমুখ্যে পৌৰ কৰ্মচাৰীসকলৰ উপৰি কাৰ্যবাহী বিষয়া প্ৰঞ্জল দাস, সাংবাদিক পুলক হাজৰিকা, আমিৰ খান, তুষাৰ হাজৰিকা, ৰূপজ্যোতি শইকীয়া, ভাস্কৰ দাসসহ কেইবাগৰাকীও বিশিষ্ট ব্যক্তি উপস্থিত থাকে ।