নিউ বঙাইগাঁৱত অবৈধ জুৱাৰ ঘাটীত আৰক্ষীৰ অভিযানঃপাঁচজনক আটক

বঙাইগাঁঁৱৰ প্ৰতিবেদক:

বঙাইগাঁও চহৰৰ নিউ বঙাইগাঁৱত চলি থকা অবৈধ জুৱাৰ ঘাটিত মঙলবাৰে আৰক্ষীয়ে অভিযান চলায় ৷ এই অভিযানত আৰক্ষীয়ে পাঁচজন জুৱাৰীক আটক কৰিবলৈ সক্ষম হয় যদিও আন কেইবাজনো জুৱাৰীয়ে পলায়ন কৰে ৷ উত্থাপিত অভিযোগ মতে যাদৱ উপাধিৰ ব্যক্তি এজনে নিউ বঙাইগাঁও টুনীয়াপাৰ বজাৰৰ ওচৰত থকা দোকানৰ পিচফালৰ এক গোপন স্থানত দীৰ্ঘদিন ধৰি জুৱাৰ বেহা চলাই আহিছিল।প্ৰতিদিনে দিনৰ ২ মান বজাৰ পৰা  নিশালৈকে চলে এই জুৱা খেল ৷ এই জুৱাত ভাগ লৈ ইতিমধ্যে সৰ্বস্বান্ত হৈছে বহুজন ৷ অৱশেষত মঙলবাৰে আৰক্ষীয়ে এই অবৈধ জুৱা খেল চলি থকা খবৰ লাভ কৰাৰ পিচতে জুৱাৰ ঘাটীত অভিযান চলায়।বিয়লিৰ ভাগত চলোৱা এই অভিযানত ভালেকেইজন জুৱাৰীৰ লগতে জুৱাৰ গৰাকী আদি পলায়ন কৰে যদিও পাঁচজন জুৱাৰীক আৰক্ষীয়ে আটক কৰি বঙাইগাঁও থানালৈ আনে ৷ জিলাৰ উপ-আৰক্ষী অধীক্ষক অমৃতৰাজ চৌধুৰীৰ নেতৃত্বত বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া, টি এছ আই আদিয়ে এই অভিযান চলায় ৷ আৰক্ষীয়ে জুৱাস্থলীৰ পৰা নিউ বঙাইগাঁৱৰ মণিৰ মিঞা(৪৩),চাহাবুদ্দিন (২২),প্ৰবীণ চৌধুৰী(৩৫) ভাওলাগুৰীৰ নুৰ আলম(৩০)ৰ লগতে আন এজন ১৭ বছৰীয়া যুৱকক আটক কৰে ৷ আৰক্ষীয়ে আটকাধীন কেইজনৰ পৰা কিছু ধন,মোবাইল,এটিএমকাৰ্ড আদি উদ্ধাৰ কৰে ৷আটাইকেইজন জুৱাৰীকে আৰক্ষীয়ে বঙাইগাঁও সদৰ থানাত সোধ-পোচ কৰে।উল্লেখ্য যে নিউ বঙাইগাঁৱৰ এই অঞ্চলটোত অবৈধ সুৰাৰো বেহা চলি থকা বুলি অভিযোগ উত্থাপন হৈ আহিছে।