নামৰূপত ৰক্তদান শিবিৰ সম্পন্ন

নামৰূপৰ পৰা সমীৰণ বৰুৱাৰ প্ৰতিবেদন :

নামৰূপ মহাবিদ্যালয়ৰ এন এছ এছ গোট আৰু ডিব্ৰুগড় জিলাৰ টিম হিউমেনিটিৰ  উদ্যোগত নামৰূপ মহাবিদ্যালয়ত সোমবাৰে  এক বিশাল ৰক্ত দান শিবিৰ আয়োজন কৰা হয়। নামৰূপ মহাবিদ্যালয়ৰ এন এছ এছ গোটৰ সমন্বয়ক তথা ৰাজনীতি বিজ্ঞান বিভাগৰ সহকাৰী অধ্যাপক শ্ৰীযুত কল্যাণ গগৈ আৰু টিম হিউমেনিটিৰ ডিব্ৰুগড় জিলাৰ সভানেত্ৰী শ্ৰীমতী কস্তুৰী ধাদুমিয়াই সমগ্ৰ কাৰ্য্যসূচী পৰিকল্পনা আৰু  সফল ৰূপায়ণত গুৰুত্বপূৰ্ণ ভূমিকা পালন কৰে। নামৰূপ মহাবিদ্যালয়ৰ ছাত্ৰ-ছাত্ৰী, শিক্ষক, নামৰূপৰ বিভিন্ন দল সংগঠন, নামৰূপ মহাবিদ্যালয় প্ৰাক্তন ছাত্ৰ-ছাত্ৰী, নামৰূপস্থিত চি আই এছ এফ ইউনিটৰ জোৱান, দাতিঁকাষৰীয়া ৰাইজ আৰু নামৰূপ মহাবিদ্যালয়ৰ এন এছ এছ ইউনিটৰ সদস্যসকলে উক্ত কাৰ্যসূচীত ৰক্তদান কৰে। পুৱা ১০ বজাৰে পৰা আৰম্ভ হোৱা ৰক্ত সংগ্ৰহ  কাৰ্যসুচীত আৰু বহুলোকে ৰক্তদান কৰিবলৈ ইচ্ছা প্ৰকাশ কৰিছিল যদিও সময়ৰ অভাৱত প্ৰায় ৬০জন লোকৰ পৰাহে সংগ্ৰহ কৰিব পৰা হয়।

ৰক্ত গ্ৰহণ প্ৰক্ৰিয়াটো ডিব্ৰুগড় চিকিৎসা মহাবিদ্যালয়ৰ পৰা অহা ডা: ৰূপম শৰ্মা আৰু ডা: সংঘমিত্ৰা মুখাৰ্জীয়ে পৰিচালনা কৰে। ৰক্তগ্ৰহণ প্ৰক্ৰিয়া চলি থকাৰ সমান্তৰালকৈ নামৰূপ মহাবিদ্যালয়ৰ প্ৰেক্ষাগৃহত টিম হিউমেনিটি আৰু এন এছ এছৰ উদ্যোগত নামৰূপ মহাবিদ্যালয় অধ্যক্ষ শ্ৰীযুত অতুল গগৈৰ সভাপতিত্বত ৰক্ত দান সম্পৰ্কীয় এক সজাগতা সভা অনুষ্ঠিত কৰা হয়। এই সজাগতা সভাৰ কাৰ্যসুচীত যোৰহাটৰ পৰা অহা টিম হিউমেনিটিৰ কেন্দ্ৰীয় সম্পাদক শ্ৰীযুত দিব্যজ্যোতি কলিতাই ভাষণ আগবঢ়াই। তাৰোপৰি সভাত উপস্থিত থকা নামৰূপ মহাবিদ্যালয়ৰ উপাধ্যক্ষ শ্ৰীযুত বিমল চন্দ্ৰ গগৈ, চি আই এছ এফৰ ডেপুটি জেনেৰেল শ্ৰীযুত আয়াৰ, ডা: ৰূপম শৰ্মা আৰু নামৰূপ মহাবিদ্যালয়ৰ উদ্ভিদ বিজ্ঞান বিভাগৰ সহকাৰী অধ্যাপক জয়ন্ত সোণোৱালে উঠি অহা যুৱচামক ৰক্তদানৰ দৰে মহৎ কৰ্মত অংশগ্ৰহণ কৰি সমাজৰ হিতৰ কাৰণে কাম কৰি যাবলৈ আহ্বান জনায়।  এই কাৰ্য্যসূচীত অসমৰ বিভিন্ন ঠাইৰ পৰা অহা চিত্ৰ শিল্পীয়ে ৰং তুলিকাৰে ৰক্তদান সৰ্ম্পকীয় চিত্ৰ আঁকি ৰাইজক সজাগ কৰি তুলিবলৈ প্ৰয়াস কৰে। নাচ-গান আৰু নাটকেৰে টিম হিউমেনিটিৰ কলা-কুশলীসকলে উপস্থিত ৰাইজক উদ্দেশ্যি ৰক্তদান সৰ্ম্পকীয় সজাগতা অনুষ্ঠান পৰিৱেশন কৰে।