বহিঃৰাজ্যত বিক্ৰী কৰিবলৈ নিয়া সোণাৰিৰ কন্যা শিশুক উদ্ধাৰ: এজনক আটক

সোণাৰিৰ পৰা ঘন বৰা

চৰাইদেউ আৰক্ষীয়ে দেওবাৰে অভিযান চলাই সোণাৰিৰ এগৰাকী কন্যা শিশুক বহিঃৰাজ্যত বিক্ৰী কৰিবলৈ নি থকা অৱস্থাত উদ্ধাৰ কৰাৰ লগতে অভিযুক্ত অপহৰণকাৰীক আটক কৰি বিশেষ সফলতা অৰ্জন কৰিছে।ঘটনাৰ বিৱৰণী মতে সোণাৰি আৰক্ষী থানাৰ অন্তৰ্গত ৰতনপুৰ চাহ বাগিচাৰ বালিজান অঞ্চলৰ এগৰাকী পিতৃ-মাতৃহীনা আঠ বছৰীয়া কন্যা শিশুক যোৱা ২ ছেপ্টেম্বৰত জিলাখনৰ সাপেখাতী আৰক্ষী থানাৰ অন্তৰ্গত গুদাম চাৰিআলিৰ নিবাসী সম্বন্ধীয় খুড়াক ভৰত মাঝিয়ে ঘৰৰ পৰা কৌশলেৰে অপহৰণ কৰি নিয়ে।ঘটনা সন্দৰ্ভত উক্ত দিনাই নিজৰ খুড়াকে সোণাৰি আৰক্ষী থানাত এক এজাহাৰ দাখিল কৰে।এজাহাৰৰ ভিত্তিত চৰাইদেউ জিলাৰ উপ-আৰক্ষী অধীক্ষক বিভাস দাসে বিশেষ তৎপৰতা দেখুৱাই ত্ৰিপুৰা আৰক্ষীৰ সহযোগত মাত্ৰ এদিনৰ ভিতৰতে শিশু গৰাকীক ত্ৰিপুৰাৰ  ধৰ্মপুৰ জিলাৰ চূড়াইবাৰী আৰক্ষী থানাৰ অন্তৰ্গত ফুলবাৰী অঞ্চলত থকা এটা শিলৰ কুঁৱৰীৰ পৰা উদ্ধাৰ কৰাৰ লগতে অভিযুক্ত অপহৰণকাৰীকো আটক কৰিবলৈ সক্ষম হয়।এই সন্দৰ্ভত আৰক্ষী বিষয়াগৰাকীয়ে জনোৱা মতে শিশুগৰাকীৰ পৰিয়ালৰ পৰা অপহৰণকাৰী ভৰতৰ মোবাইল নম্বৰ সংগ্ৰহ কৰি আৰক্ষী বিষয়াজনে নম্বৰটো ট্রেক কৰাত প্ৰথমতে  ভৰত নগাঁও জিলাৰ লামডিং অঞ্চলত থকা বুলি দেখুৱাই।পাছত উক্ত নম্বৰত ফোন কৰোতে ফোনৰ গৰাকীয়ে নম্বৰটো ভৰতৰ নহয়,ভৰতে তেওঁৰ ঘৰত ভাড়া থাকি তেওঁৰ মোবাইলেৰে বিভিন্ন ঠাইত ফোন কৰা বুলি জানিবলৈ দি তেওঁ ভৰতৰ আচল মোবাইল নম্বৰটো প্ৰদান কৰে।পিছত ভৰতৰ আচল নম্বৰটো ট্ৰেক কৰাত মোবাইল ফোনটো বন্ধ হৈ থকা দেখুৱাই যদিও ভৰত ত্ৰিপুৰাৰ উক্ত অঞ্চলটোত আত্মগোপন কৰি থকা বুলি নিশ্চিত হয়।পিছত এই সংক্ৰান্তত ত্ৰিপুৰা আৰক্ষীক অৱগত কৰাত ত্ৰিপুৰা আৰক্ষীয়ে শিশুটিক উক্ত অঞ্চলৰ পৰা উদ্ধাৰ কৰাৰ লগতে অভিযুক্ত ভৰতকো আটক কৰে।ত্ৰিপুৰা আৰক্ষীৰ আগত ভৰতে শিশুগৰাকীক বিক্ৰী কৰিবলৈ নিয়াৰ কথা ইতিমধ্যে স্বীকাৰ কৰিছে। সোণাৰিৰ আৰক্ষীৰ দলটোৱে অপহৰণকাৰী ভৰত আৰু শিশুটিক ত্ৰিপুৰাৰ পৰা আনি   সোণাৰিত উপস্থিত হোৱাৰ পিছতে পৰিয়ালৰ হাতত চমজাই দিয়ে।