বঙাইগাঁৱত উত্তৰ-পূব হৰিদেৱ সংঘৰ ৪২ সংখ্যক দ্বি-বাৰ্ষিক অধিৱেশন

'আজিৰে পৰা প্ৰায় ৫৫০ বছৰ পূৰ্বতেই মহাপুৰুষ হৰিদেৱে নাৰী সৱলীকৰণত মনোনিৱেশ কৰিছিল ৷ সেইবাবেই তেওঁৰ ধৰ্মত পুৰুষ, নাৰী, হিন্দু, মুছলমানৰ ভেদাভেদ নাছিল ৷ তেখেতৰ বহল দৃষ্টিভংগী, মহান দূৰদৰ্শিতাৰে ধৰ্মৰ মাজেদি আজিৰ সমাজৰ কেৰোণসমূহৰ নিৰ্মুলকৰণৰ উপায় দি গৈছে ৷ তেওঁৰ আদৰ্শ মানি চলাটোৱেই হৈছে এখন সুস্থ, সভ্য সমাজ গঠনৰ মুলমন্ত্ৰ ৷' এই ভাষ্য উত্তৰ-পূব ভাৰত হৰিদেৱ সংঘৰ কাৰ্যকৰী সভাপতি কুলৰঞ্জন ভূঞাৰ ৷

উল্লেখ্য যে শুকুৰবাৰৰ পৰা বঙাইগাঁও চহৰৰ দোলাইগাঁওস্থিত উত্তৰ বঙাইগাঁও হাইস্কুল খেলপথাৰৰ মহাপুৰুষ শ্ৰীশ্ৰী হৰিদেৱ ক্ষেত্ৰত অনুষ্ঠিত হোৱা উত্তৰ-পূব ভাৰত হৰিদেৱ সংঘৰ ৪২ সংখ্যক দ্বি-বাৰ্ষিক অধিবেশনৰ আজি দ্বিতীয় দিনৰ কাৰ্যসূচীৰ ধৰ্মালোচনী সভাত ভাষণ প্ৰদান কৰি তেওঁ এইদৰে কয় ৷ 'মহাপুৰুষ শ্ৰী শ্ৰী হৰিদেৱৰ বৈদিক ভাগৱতী বৈঞ্চৱ ধৰ্ম প্ৰচাৰ, দৰ্শন আৰু ইয়াত মহিলাৰ স্থান' শীৰ্ষক ধৰ্মালোচনী সভাখন সঞ্চালনা কৰি দিয়া ভাষণত তেওঁ আৰু কয়  যে আত্মাৰ জৰিয়তে পৰমাত্মাক যোৱাৰ যিটো পথ সেইটোৱে হৈছে ধৰ্ম ৷

সেয়ে চব্বিছ তত্ত্ব নাজানিলে আমি কেতিয়াও ভাগৱতক বুজি নাপাম আৰু ভাগৱতক বুজি নাপালে হৰিদেৱক বুজি পোৱা নাযাব ৷ অভয়াপুৰী মহাবিদ্যালয়ৰ অধ্যাপক ধীৰেন শৰ্মাই উদ্বোধন কৰা এই ধৰ্মালোচনী সভাত নলবাৰী মহাবিদ্যালয়ৰ প্ৰাক্তন অধ্যাপক ডঃ বসন্ত কুমাৰ ভট্টাচাৰ্য, অসম সংস্কৃত বোৰ্ডৰ প্ৰাক্তন সচিব ডঃ বিমল কৃষ্ণ ভট্টাচাৰ্য, দিছপুৰ মহাবিদ্যালয়ৰ দৰ্শন বিভাগৰ অধ্যাপিকা ডঃ সুমিত্ৰা চৌধুৰী, বৰমহৰা সত্ৰৰ সত্ৰাধিকাৰ প্ৰদীপ গোস্বামী, কৃষ্ণকান্ত সন্দিকৈ সংস্কৃত মহাবিদ্যালয়ৰ অধ্যাপক ডঃ ৰঞ্জন কুমাৰ চক্ৰৱৰ্তী, উত্তৰ-পূব হৰিদেৱ সংঘৰ আইন উপদেষ্টা পুলিন গোস্বামী প্ৰমুখ্যে কেইবাজনো বিশিষ্ট ব্যক্তিয়ে আলোচক হিচাপে অংশগ্ৰহণ কৰি বিষয়বস্তুৰ ওপৰত বক্তব্য ৰাখে ৷

ইপিনে অধিৱেশনৰ আজি দ্বিতীয় দিনৰ কাৰ্যসূচীৰ শুভাৰম্ভ হয় ঊষা কীৰ্তন আৰু গুৰু বন্দনাৰে ৷ গুৰু বন্দনা পৰিৱেশন কৰে টিহু শাখা সত্ৰ মহাসভাৰ ভকতবৃন্দই ৷ ইয়াৰ পিচত ভাগৱত পাঠ কৰে জগত ভূঞাই ৷ আনহাতে, সংঘৰ পতাকা উত্তোলন কৰে কাৰ্যকৰী সভাপতি কুলৰঞ্জন ভুঞাই ৷ একেদৰে ৪১জন গুৰুভাইৰ দ্বাৰা আন ৪১খন পতাকা উত্তোলন কৰা হয় ৷ শ্ৰদ্ধাঞ্জলি তৰ্পণ কৰে সংঘৰ সাধাৰণ সম্পাদক কৰুণা কান্ত তালুকদাৰে আৰু বন্তি প্ৰজ্বালন কৰে কোষাধ্যক্ষ বিমল আগৰৱালাই ৷

আবেলিৰ ভাগত সংঘৰ আজীৱন সদস্যসকলৰ সাধাৰণ সভা অনুষ্ঠিত হয় ৷ সন্ধিয়া বন্তি প্ৰজ্বলন, গুৰুচৰিত পাঠ আৰু ভক্তিমূলক সাংস্কৃতিক অনুষ্ঠান অনুষ্ঠিত হয় ৷ সাংস্কৃতিক অনুষ্ঠান উদ্বোধন কৰে বীৰঝৰা উচ্চতৰ মাধ্যমিক বিদ্যালয়ৰ অধ্যক্ষ গণেশ্বৰ দেৱশৰ্মাই ৷