বুঢ়া সত্ৰীয়া বশিষ্ঠদেৱ শৰ্মালৈ ২০১৭ বৰ্ষৰ শঙ্কৰদেৱ বঁটা : বৰপেটা জিলা ছাত্ৰ সন্থাৰ উষ্ম অভিনন্দন

চেঙাৰ পৰা সুৰজিৎ পাঠক

অৱশেষত যোগ্যজনলৈ যোগ্য সন্মান আগবঢ়ালে চৰকাৰে। ২০১৭ বৰ্ষৰ শংকৰদেৱ বঁটাৰ বাবে মনোনীত কৰা হ'ল বৰপেটা সত্ৰৰ বুঢ়া সত্ৰীয়া বশিষ্ঠদেৱ শৰ্মাক৷ এক জীৱনজোৰা সাধনাৰে সত্ৰনগৰী বৰপেটাৰ লগতে সমগ্ৰ অসমতে সত্ৰীয়া-সংস্কৃতিৰ প্ৰচাৰ আৰু প্ৰসাৰৰ বাবে অহোপুৰুষাৰ্থ কৰি অহা বৰপেটা সত্ৰৰ বুঢ়া সত্ৰীয়া বশিষ্ঠদেৱ শৰ্মাই আধ্যাত্মিক চিন্তা আৰু চেতনাকে সমল হিচাপে লৈ নিজকে সমৰ্পিত কৰি আহিছে। প্ৰায় সত্তৰৰ দেওনা অতিক্ৰম কৰাৰ পাছতো এজন চফল ডেকাৰ দৰে আজিৰ তাৰিখতো বশিষ্ঠদেৱ শৰ্মাৰ কৰ্মোদ্যম সত্ৰীয়া সংস্কৃতিৰ ক্ষেত্ৰখনৰ বাবে  নিঃসন্দেহে উদ্দীপনাৰ বিষয়। এনে এগৰাকী ব্যক্তিক শঙ্কৰদেৱ বঁটা ২০১৭ প্ৰদানৰ সিদ্ধান্তই স্বাভাৱিকতে আনন্দৰ লহৰ উঠিছে সত্ৰনগৰী বৰপেটাত।

এই আপাহতে আজি আবেলি বুঢ়া সত্ৰীয়া বশিষ্ঠদেৱ শৰ্মাৰ নিজ বাসগৃহলৈ গৈ তেখেতক উষ্ম অভিনন্দন জ্ঞাপন কৰে সদৌ বৰপেটা জিলা ছাত্ৰ সন্থাই। সদৌ অসম ছাত্ৰ সন্থাৰ উপ-সভাপতি প্ৰদীপ দাস, জিলা ছাত্ৰ সন্থাৰ সভাপতি কৃষ্ণকান্ত দাস, প্ৰাক্তন সভাপতি খনীন পাঠক আৰু খিলঞ্জীয়া সুৰক্ষা বাহিনী অসমৰ মুখ্য আহ্বায়ক গোবিন্দ গায়নে এই বঁটাৰ বাবে নিৰ্বাচিত কৰাত ৰাজ্য চৰকাৰক ধন্যবাদ জ্ঞাপন কৰি কয় যে যোগ্যজনলৈ যোগ্য সন্মান আগবঢ়োৱা হ'ল। এই সন্মানে বুঢ়া সত্ৰীয়াগৰাকীক আৰু উৎসাহিত কৰিব। ইফালে ৰাজ্য চৰকাৰে এই বঁটাৰ বাবে তেওঁৰ নাম ঘোষণা কৰাত সন্তোষ প্ৰকাশ কৰি সকলোকে ধন্যবাদ জ্ঞাপন কৰে।