আজি ৰাজেশ খান্নাৰ জন্মদিন : দুৰ্লভ ফটো প্ৰকাশ টুইংকলৰ

এসময়ৰ দেশৰ যুৱতীসকলৰ হাৰ্ট থ্ৰব, ছুপাৰ ষ্টাৰ ৰাজেশ খান্নাৰ আজি জন্মদিন৷ পিতৃৰ জন্মদিন উপলক্ষে টুইংকল খান্নাই টুইটাৰত মুকলি কৰে খান্নাৰ এখন দুৰ্লভ আলোকচিত্ৰ৷

ছবিখনত খান্নাই তেওঁৰ বাংলোৰ বেলকনিৰ পৰা অনুৰাগীসকলক সম্বোধন কৰা দেখা গৈছে৷ আলোক চিত্ৰখন মুকলি কৰি টুইংকল খান্নাই পিতৃৰ জন্মদিন পালন সম্পৰ্কীয় এটা আমোদজনক ঘটনা সদৰী কৰে৷

টুইংকলে কয়, 'আমি দুয়ো পিতৃ-কন্যাৰ জন্মদিন একেটা দিনতে৷ যেতিয়া মই সৰু আছিলোঁ সেই দিনটোত ট্ৰাকভৰ্তি ফুল আমাৰ ঘৰলৈ আহিছিল৷

মোক তেতিয়া ফুচুলাইছিল যে সেই ফুল মোৰ জন্মদিনৰ উপহাৰ হিচাপে আহিছিল৷ তেতিয়া মই সেই কথা বিশ্বাস কৰিছিলোঁ যদিও অলপ বুজা হোৱাত অৱগত হৈছিলোঁ যে সেই ফুলবোৰ দেউতাৰ বাবেহে জন্মদিনৰ উপহাৰ আছিল৷

সেয়াই আছিল ৰাজেশ খান্নাৰ অভূতপূৰ্ব জনপ্ৰিয়তা৷' উল্লেখ্য যে ষাঠিৰ দশকৰ শেষাৰ্ধত আৰু সত্তৰৰ দশকৰ আৰম্ভণিৰ কেইটামান বছৰত ৰাজেশ খান্নাৰ সমান জনপ্ৰিয় কোনো তাৰকা বলীউডত নাছিল৷ খান্নাই ধাৰাবাহিকভাৱে ১০খনতকৈ অধিক হিট চিনেমা উপহাৰ দিছিল৷