নগাঁৱত ক্ৰমশঃ শক্তিশালী হৈছে অগপ : সংখ্যালঘু অধ্যুষিত এলেকাত ব্যাপক সঁহাৰি

নগাঁৱৰ পৰা ৱাহিদুদ জামান

এসময়ৰ আঞ্চলিক ৰাজনীতিৰ অন্যতম শক্তিশালী দুৰ্গ হিচাপে চিহ্নিত নগাঁও জিলাত পুনৰ জীপাল হৈ উঠিছে ৰাজ্যৰ অন্যতম আঞ্চলিক ৰাজনৈতিক দল অসম গণ পৰিষদ চমুকৈ অগপ । মিত্ৰতাক লৈ ব্যাপক দুদুল্যমান স্থিতিত থকা শেহতীয়াকৈ অগপই পঞ্চায়ত নিৰ্বাচন অকলেই খেলাৰ সিদ্ধান্ত লোৱাৰ পিছৰে পৰা নগাঁৱত ক্ৰমশঃ শক্তিশালী হৈ উঠাৰ প্ৰতিচ্ছবি দেখিবলৈ পোৱা গৈছে ।

ইতিমধ্যে জিলাখনত বহু লোকে অগপ দলত যোগদান কৰিছে । আঞ্চলিক দলটোৱে নগাঁও জিলাৰ প্ৰতিটো জিলা পৰিষদ সমষ্টিৰ লগতে প্ৰতিটো পঞ্চায়তৰ সভাপতি-আঞ্চলিক পঞ্চায়তৰ সদস্য পদৰ বাবে নিজা দলীয় প্ৰাৰ্থী থিয় কৰাইছে । আনকি এইবাৰ দলটোৰ পৰা প্ৰাৰ্থিত্ব বিচাৰি বহু প্ৰাৰ্থীয়ে হেতা-ওপৰা লগোৱা কাৰ্যই দলটোলৈ এক আশাৰ ৰেঙনি কঢ়িয়াই আনিছে । লক্ষণীয়ভাৱে অগপ দললৈ আগমন ঘটিছে বহু ধৰ্মীয় সংখ্যালঘু লোকৰ ।

এইবাৰ পঞ্চায়ত নিৰ্বাচনত নগাঁও জিলাত পঞ্চায়তৰ টিকট বিচৰাসকলৰ মাজত সংখ্যালঘু লোকৰ তালিকাখন পূৰ্বতকৈ দীঘলীয়া হোৱাই নহয়, অধিকাংশই দলীয় টিকট লাভ কৰিবলৈও সক্ষম হৈছে । জিলাখনৰ ২৯টা জিলা পৰিষদ সমষ্টিৰ ভিতৰত অগপই ১০টা জিলা পৰিষদ সমষ্টিত সংখ্যালঘু প্ৰাৰ্থীক প্ৰক্ষেপ কৰিছে । এইসকলৰ ভিতৰত জিলাখনৰ শিঙীয়া জিলা পৰিষদ সমষ্টিত আৰশ্বাদ আলী মৰল, গড়াজানত আমিনুল ইছলাম, বেচামাৰীত আৰমিনা খাতুন, পূব-থৰিয়াত চুমি বেগম, বটদ্ৰৱাত মাৰ্জিনা বেগম, জুৰীয়াত মৰজিনা বেগম, ভকতগাঁৱত হাবিজুৰ ৰহমান, ৰূপহীহাটত মমতাজ বেগম, টুকটুকীত আমিৰ হুছেইন আৰু জৰামাৰী-আলিটাঙনিত ৰিয়াজুল হকক প্ৰাৰ্থিত্ব প্ৰদান কৰিছে ।

আনকি জিলাখনৰ সংখ্যালঘু অধ্যুষিত সমষ্টি ক্ৰমে ৰূপহীহাট, ধিং, ৰহা, চামগুৰিত অগপই পঞ্চায়তৰ সভাপতি, আঞ্চলিক পঞ্চায়তৰ সদস্যৰ প্ৰাৰ্থিত্বৰ ক্ষেত্ৰত সংখ্যালঘু লোকক অগ্ৰাধিকাৰ দিয়া পৰিলক্ষিত হৈছে । তাৰোপৰি বিগত পঞ্চায়ত নিৰ্বাচনত প্ৰাৰ্থী বিচাৰি হাহাকাৰ কৰা অগপই এইবাৰ প্ৰাৰ্থিত্বপ্ৰত্যাশীৰ হেতা-ওপৰাৰ বাবে প্ৰাৰ্থীৰ চূড়ান্ত তালিকা প্ৰকাশ কৰাটো বিলম্ব হৈছে ।

বহুকেইটা জিলা পৰিষদ সমষ্টি আৰু পঞ্চায়তত অগপৰ বঞ্চিত প্ৰাৰ্থী ক্ষোভিত হৈ মাৰপিটত লিপ্ত হৈছে । কালি প্ৰাৰ্থিত্বকেন্দ্ৰিক সংঘাতৰ ফলত জিলা অগপৰ কাৰ্যালয়ত এক উত্তপ্ত পৰিস্থিতিৰ সৃষ্টি হোৱাৰ লগতে পৰিস্থিতি নিয়ন্ত্ৰণৰ বাবে আৰক্ষী-চিআৰপিএফ মোতায়েন কৰিবলগা হৈছিল । দীৰ্ঘদিনৰ বিৰতিৰ মূৰত অগপলৈ অহা এই পৰিবেশে অগপৰ তৃণমূল পৰ্যায়ৰ নেতা-কৰ্মীসকলক স্বাভাৱিকতে উৎসাহিত কৰি তোলাৰ লগতে আঞ্চলিক দলটোলৈ অহা এই সজীৱতাই আঞ্চলিক ৰাজনীতিৰ লগত জড়িত কাণ্ডাৰীসকলকো উৎসাহিত কৰি তুলিছে ।

তাৰোপৰি বিজেপি-কংগ্ৰেছৰ পৰা টিকট লাভ নকৰা বঞ্চিত একাংশ প্ৰাৰ্থীৰ লগতে তেওঁলোকৰ সমৰ্থন অগপলৈ দিছে । নিৰ্বাচনত অকলেই অৱতীৰ্ণ হৈ অগপই মূৰকত কি ফলাফল দেখুৱাবলৈ সক্ষম হ'বগৈ, সেইটো সময়ে ক'ব যদিও বৰ্তমান প্ৰেক্ষাপটত আঞ্চলিক ৰাজনীতিয়ে এনেদৰে গুৰুত্বৰ লাভ কৰা বিষয়টোৱে বিশেষ তাৎপৰ্য বহন কৰিছে ।