নগাঁৱৰ বেবেজীয়াত আৰক্ষী-বাতৰি কাকত যোগনিয়াৰক সম্বৰ্দ্ধনা

নগাঁৱৰ পৰা ঋতু পৰ্ণ শৰ্মা:

'লকডাউন'ৰ মাজতে নগাঁও জিলাৰ 'প্ৰেছ ক্লাব,বেবেজীয়া'ই আৰক্ষীৰ লগতে বৃহত্তৰ অঞ্চলটোত বাতৰি কাকত যোগান ধৰা ব্যক্তিসকলক সম্বৰ্দ্ধনা জনায়।ক'ৰ'না যোদ্ধা হিচাপে বৃহত্তৰ অঞ্চলটোত সেৱা আগবঢ়াই অহা বেবেজীয়া পহৰা আৰক্ষী চকী আৰু জাজৰি আৰক্ষী থানাৰ কৰ্তব্যৰত আৰক্ষীসকল তথা বাতৰি কাকত যোগান ধৰা ১৩ গৰাকী যোগনিয়াৰক সম্বৰ্দ্ধনা জনোৱা হয় একোখনকৈ ফুলাম গামোচাৰ লগতে থলুৱাভাৱে নিৰ্মিত মাস্কৰে।প্ৰতিকূল বতৰকো নেওচি সামাজিক দূৰত্ব বৰ্তাই ৰাখি সম্বৰ্দ্ধনা জনোৱা বাতৰি কাকত যোগান ধৰা ব্যক্তিসকল হ'ল--অৰুণ বৰদলৈ,কনক বৰা,ভদ্ৰ বৰা,সুভাষ মেধি,কিনাৰাম বৰদলৈ,দণ্ডি কলিতা,বাবা হাজৰিকা,ৰঞ্জিত টেৰণ,শান্তনু বৰা,গোলাপ বৰদলৈ,ধন্তি বৰুৱা,ৰেকিব আহমেদ আদি।সম্বৰ্দ্ধনা গ্ৰহণ কৰি জাজৰি আৰক্ষী থানাৰ ভাৰপ্ৰাপ্ত বিষয়া মলয় আচাৰ্যই কয় যে প্ৰেছ ক্লাব,বেবেজীয়াৰ এনে সম্বৰ্দ্ধনাই আৰক্ষীক আৰু অধিক ভাল কাম কৰিবলৈ উৎসাহিত কৰিলে।তেওঁ অসম আৰক্ষীয়ে ৰোগাক্ৰান্ত বয়োজ্যেষ্ঠসকলক ঘৰতেই প্ৰয়োজনীয় ঔষধ-পাতি যোগানৰ বাবে লোৱা পদক্ষেপৰ কথা ব্যক্ত কৰি কয় যে জাজৰি আৰক্ষীয়ে ইতিমধ্যে কেইবাগৰাকীও এনে লোকক সহায়ৰ হাত আগবঢ়াইছে।বেবেজীয়াৰ আগশাৰীৰ বাতৰি কাকত যোগান ধৰা প্ৰতিষ্ঠান 'শইকীয়া এন্টাৰপ্ৰাইজ'ৰ সন্মুখত আয়োজিত অনুষ্ঠানত বেবেজীয়া আৰক্ষী পহৰা চকীৰ ভাৰপ্ৰাপ্ত বিষয়া কালিধৰ থাওচেন,দ্বিতীয় ভাৰপ্ৰাপ্ত বিষয়া প্ৰহ্লাদ নাথ,ডিমৰীয়া মহাবিদ্যালয়ৰ হিন্দী বিভাগৰ মুৰব্বী অধ্যাপক মোহিনী মোহন ডেকা,শিল্পী গম্ভীৰ নাথ,শইকীয়া এন্টাৰপ্ৰাইজৰ পৰিচালক অতুল বৰা,দিলীপ ক্লথ ষ্ট'ৰৰ স্বত্বাধিকাৰী দিলীপ দত্ত আৰু প্ৰেছ ক্লাবৰ সদস্যসকল উপস্থিত থাকে।উল্লেখযোগ্য যে এই দুৰ্যোগৰ সময়ত সামাজিক দায়বদ্ধতা ৰক্ষা কৰি অবিৰতভাৱে নিতৌ পুৱা বৃহত্তৰ বেবেজীয়া অঞ্চলত পচন্দৰ বাতৰি কাকতখন যোগনিয়াৰসকলে পঢ়ুৱৈসকলৰ হাতত তুলি দি আহিছে।