বাক্সা জিলাৰ শিলবাৰীত পথ দুৰ্ঘটনাত নিহত এজন,আহত পাঁচজন

গুঞ্জন দাস,জালাহ:

'লকডাউন'ৰ সময়তেই বাক্সা জিলাৰ শিলবাৰীত ১২৭-এ ৰাষ্ট্ৰীয় ঘাইপথত শনিবাৰে এটা ভয়ংকৰ পথ দুৰ্ঘটনাত এজন লোক নিহত হোৱাৰ লগতে পাঁচজন লোক কম- বেচি পৰিমাণে আহত হয়।আৰক্ষীয়ে উল্লেখ কৰা মতে AS-17A 7555 নং Chevrolet Spark চাৰিচকীয়া গাড়ীৰ খুন্দাত AS 28 9325 নম্বৰৰ স্কুটী আৰোহী এগৰাকী থিতাতে নিহত হোৱাৰ ঘটনাত সমগ্র এলেকাটোতেই চাঞ্চল্যৰ সৃষ্টি হয়।নিহত লোকজন বাক্সা জিলাৰ পূব অঞ্চলী নিবাসী দুই সন্তানৰ পিতৃ সুনীল বড়ো (৪৫)।সুনীলে পত্নী ৰিনিকী বড়োৰ লগতে আঠ বছৰ বয়সীয়া হীৰক বড়ো আৰু তিনি বছৰীয়া চয়ানিকা বড়োক ইহসংসাৰত এৰি থৈ যায়।আনহাতে, কম-বেচি পৰিমাণে আহত হোৱাসকলৰ ভিতৰত গাড়ীখনৰ চালক ধুবুৰী জিলাৰ খুৰ্চিদ আলম,মুমিৰ হুচেইন,ইচুহুক আলী,সুভাষচন্দ্র সেন আৰু গুফুৰ আলি।উল্লেখ্য যে স্কুটী আৰোহী সুনীল বড়োয়ে হোমিও ঔষধ আনিবলৈ গৈ থাকোতেই শিলবাৰীত  পিছফালৰ পৰা  AS 17 A 7555 নম্বৰৰ Spark খনে খুন্দা মৰাৰ ফলতেই এই ভয়ংকৰ দুৰ্ঘটনাটো সংঘটিত হয়।ই-পাছ লৈ বাক্সা জিলাৰ পৰা ধুবুৰী অভিমুখে  চাৰিচকীয়া বাহনখন গৈ আছিল।পিছত ঘটনাস্থলীত শিমলা আৰক্ষী উপস্থিত হৈ মৃতদেহ সহিতে বাহন দুখন আৰু আহতসকলক চিকিৎসা কৰি থানালৈ লৈ আহে৷