হাজোৰ অভয়পুৰত ভয়াৱহ অগ্নিকাণ্ড

কমলাকান্ত দাস,হাজো:

হাজো ৰাজহ চক্ৰৰ অন্তৰ্গত তথা হাজো-গুৱাহাটী পথৰ অভয়পুৰত শুকুৰবাৰে সন্ধিয়া পাঁচ বজাত বৈদ্যুতিক শ্বৰ্ট-চাৰ্কিট হৈ ভয়াৱহ অগ্নিকাণ্ডৰ সূত্ৰপাত ঘটে।জানিব পৰা মতে,অভয়পুৰৰ হৰেন্দ্ৰ কলিতাৰ ঘৰৰ দ্বিতীয় মহলাত থকা ফ্ৰীজত প্ৰথমে বৈদ্যুতিক শ্বৰ্ট-চাৰ্কিট হৈ ফ্ৰীজটো সম্পূৰ্ণ জ্বলি যোৱাৰ পিছত জুই অন্য ঠাইলৈও বিয়পি পৰে।ওচৰ-চুবুৰীয়াই খিৰিকীৰে ধোঁঁৱা ওলোৱা প্ৰত্যক্ষ কৰি হাজো আৰক্ষীৰ লগতে অগ্নিনিৰ্বাপক বাহিনীক খবৰ দিয়ে।লগে লগে হাজো আৰক্ষী আৰু দুখনকৈ অগ্নিনিৰ্বাপক বাহিনীৰ গাড়ী ঘটনাস্থলীত উপস্থিত হৈ ৰাইজৰ সহযোগত প্ৰায় এঘণ্টাৰ অন্তত জুই নিৰ্বাপিত কৰিবলৈ সক্ষম হয়।দুমহলীয়া ঘৰটোৰ তলৰ মহলাত হাজোৰ চক্ৰ বিষয়াই ভাড়াতীয়া হিচাপে থাকে আৰু তেওঁ কোঠাত নথকাত তলা মৰা অৱস্থাত থকা বাবে জুই নিৰ্বাপিত কৰাত কিছু বিলম্ব হয়।এই অগ্নিকাণ্ডত লক্ষাধিক টকা মূল্যৰ সা-সম্পত্তি নষ্ট হয়।