পৃথক কমতাপুৰ ৰাজ্য গঠন আৰু জনজাতিকৰণৰ দাবীত প্ৰধানমন্ত্ৰীলৈ যুৱ ছাত্ৰ সন্মিলনীৰ স্মাৰক পত্ৰ

বঙাইগাঁওঃ 

কমতাপুৰ ৰাজ্য পুনৰ গঠন আৰু কোচ ৰাজবংশী জনগোষ্ঠীক জনজাতিকৰণৰ দাবীত আজি সদৌ অসম কোচ ৰাজবংশী যুৱ-ছাত্ৰ সন্মিলনীয়ে বঙাইগাঁও জিলা উপায়ুক্তৰ জৰিয়তে ভাৰতৰ প্ৰধানমন্ত্ৰীলৈ এখন স্মাৰকপত্ৰ প্ৰেৰণ কৰে ৷ এক প্ৰেছ বিবৃতিযোগে সদৌ অসম কোচ ৰাজবংশী যুৱ ছাত্ৰ সন্মিলনীৰ সভাপতি ত্ৰৈলোক্য ৰায় আৰু সাধাৰণ সম্পাদক ধৰ্মেন্দ্ৰ ৰায়ে এই কথা সদৰী কৰিছে ৷ বিবৃতিটোত নেতাদ্বয়ে কয় য়ে ঐতিহাসিক কমতাপুৰ অঞ্চল বিভিন্ন চক্ৰান্তৰ ফলত বৰ্তমানৰ অসম আৰু পশ্চিমবংগ ৰাজ্যৰ বেদখলী ভূমি হৈ আছে আৰু এই অঞ্চলৰ জনসাধাৰণ বঞ্চিত আৰু শোষিত হৈ আছে ৷ সেয়ে পৃথক কমতাপুৰ ৰাজ্য গঠনৰ জৰিয়তেহে এই অঞ্চলৰ জনগণৰ সৰ্বাংগীণ উন্নয়ন সম্ভৱ বুলি কৈ অনতিপলমে কমতাপুৰ ৰাজ্য গঠন কৰাৰ দাবী জনায় নেতাদ্বয়ে ৷ আনহাতে বিবৃতিটোত নেতাদ্বয়ে বড়োলেণ্ড দাবীৰ তীব্ৰ বিৰোধীতা কৰি কয় যে ঐতিহাসিক কমতাপুৰত বড়োলেণ্ডৰ দাবী অযুক্তিকৰ আৰু অদৰকাৰী ৷ কমতাপুৰ অঞ্চলত বড়োলেণ্ড গঠন হব দিয়া নহ'ব বুলিও নেতাদ্বয়ে উল্লেখ কৰে ৷ সংগঠনটোৰ সভাপতি আৰু সাধাৰণ সম্পাদকদ্বয়ে আৰু কয় যে বি টি চি গঠনে বিটিএডিত বাস কৰা ভূমিপুত্ৰ কোচ ৰাজবংশীৰ লগতে অনাবড়ো লোকসকলৰ অধিকাৰ হৰণ কৰিছে ৷ সেয়ে বিটিচি পুনৰীক্ষণৰ প্ৰয়োজন আছে ৷ নেতাদ্বয়ে সাংসদ বিশ্বজিত দৈমাৰীয়ে ৰাজ্যসভাত বড়োলেণ্ড গঠনৰ প্ৰসংগ উত্থাপন কৰা কাৰ্যক তীব্ৰ নিন্দা কৰি কয় যে  বিশ্বজিত দৈমাৰী ৰাজ্যসভাত অসমৰহে সাংসদ, বড়োৰ নহয় ৷ সাংসদ দৈমাৰী অসমক প্ৰতিনিধিত্ব কৰে বাবে অসমৰ সকলো জনগোষ্ঠীৰ আবেগ অধীকাৰক সন্মান প্ৰদৰ্শন কৰা দায়িত্ব আছে ৷ কিন্তু দৈমাৰীয় অতি উগ্ৰ আৰু ঠেক মনোবৃত্তিৰে কেৱল নিজৰ বড়ো জনগোষ্ঠীৰ একাংশই কৰা বড়োলেণ্ড দাবী তোলা কাৰ্য গৰিহণাযোগ্য ৷ দৈমাৰীৰ ৰাজনৈতিক দল বি পি এফে নিৰ্বাচনৰ সময়ত বড়োলেণ্ড দাবীৰ বিপৰীতে স্থিতি লোৱাও দেখা যায় ৷ কিন্তু অনাবড়ো ভোটাৰক ভালৰি লগাই ক্ষমতা দখলৰ বাবেহে যে সেয়া এক নাটক কৰে এই কথা এতিয়া স্বচ্ছ হৈ পৰিল ৷ গতিকে এনে বহুৰূপী দলৰ পৰা ৰাইজক সাবধানে থাকিবলৈ নেতাদ্বয়ে বিবৃতিটোত আহ্বান জনায় ৷