এনডিটিভিৰ শীর্ষপদ এৰিব লাগিব প্রণয় ৰায়ে, ছেবিৰ নির্দেশ

নিউজ ডেস্ক:

ভাৰতৰ আগশাৰীৰ ৰাষ্ট্ৰীয় টেলিভিচন চেনেল এনডিটিভিৰ সকলো শীৰ্ষ পদ এৰিব লাগিব প্ৰণয় ৰায় আৰু তেওঁৰ পত্নী ৰাধিকা ৰায়ে। ছিকিউৰিটিজ এণ্ড এক্সচেঞ্জ বোর্ড অৱ ইণ্ডিয়াই (ছেবি)। দুবছৰৰ বাবে সংস্থাৰ ডিৰেক্টৰৰ পদ এৰিব লাগিব বুলি ছেবিয়ে শুক্ৰবাৰে এই নিৰ্দেশ জাৰি কৰে। ইয়াৰ লগতে তেওঁলোকৰ সংস্থা আৰ আৰ পি আৰ-ৰ(ৰাধিকা ৰায় প্রণয় ৰায়) হ’ল্ডিংছ আৰু শ্বেয়াৰ বজাৰত প্ৰবেশ কৰিব নোৱাৰিব বুলি ছেবিয়ে নিৰ্দেশ জাৰি কৰে।
ছেবিৰ অভিযোগ মতে, ২০০৮ চনৰ পৰা ২০১০ চনৰ ভিতৰত দুটা ঋণ প্রদাণকাৰী সংস্থাৰ লগত হোৱা সংস্থাৰ চুক্তিৰ তথ্য শ্বেয়াৰ বজাৰত গোপন কৰিছে প্রণয় ৰায় আৰু ৰাধিকা ৰায়ে। এই অভিযোগৰ পৰিপ্রেক্ষিততে ছেবিয়ে এই নির্দেশ জাৰি কৰে। ইতিমধ্যে ছেবিৰ নির্দেশৰ তীব্র বিৰোধিতা কৰি এনডিটিভি কর্তৃপক্ষই আইনি যুঁজৰ বাবে সকলো প্রস্তুতি আৰম্ভ কৰিছে। সংবাদ  গোষ্ঠীৰ বিৰুদ্ধে ছেবিৰ এই নজিৰবিহীন নির্দেশক কেন্দ্ৰ কৰি সমগ্ৰ দেশৰ সংবাদ জগতত তীব্ৰ আলোড়নৰ সৃষ্টি হৈছে। বিভিন্ন মহলে ছেবিৰ এনে নিৰ্দেশৰ আঁৰত ৰাজনৈতিক প্ৰতিহিংসা থকা বুলি অভিযোগ কৰিছে। উল্লেখ্য যে ইতিপূৰ্বে ভালেমান বিষয়ত এনডিটিভিয়ে চৰকাৰ বিৰোধী স্থিতি লোৱাৰ কাৰণে প্ৰণয় ৰায় কেইবাবাৰো কেন্দ্ৰীয় চৰকাৰৰ দ্বাৰা হাৰাশাস্তিৰ সন্মুখীন হৈছিল। এই বিষয়টোক লৈ বিভিন্ন মহলে বাৰেবাৰে প্ৰশ্ন তুলিছে।

জানিব পৰা মতে, ২০০৮ চনৰ পৰা ২০১০ চনৰ ভিতৰত এনডিটিভিয়ে প্রথমে আইচিআইচিআই বেংক আৰু পিছত বিশ্বপ্রধান কমাৰ্চিয়েল প্রাইভেট লিমিটেড (ভিচিপিএল) নামৰ এটা সংস্থাৰ পৰা ঋণ লৈছিল। কিন্তু এই সম্পৰ্কীয় কোনো তথ্য প্রণয় ৰায় আৰু ৰাধিকা ৰায়ে শ্বেয়াৰ বজাৰক সদৰী কৰা নাছিল। ফলত এইবোৰ কথা নজনাকৈ বহু বিনিয়োগকাৰীয়ে শ্বেয়াৰ বজাৰত এনডিটিভি-ত বিনিয়োগ কৰিছে। তেওঁলোকৰ এই কাৰ্যক প্ৰতাৰণা বুলি আখ্যা দি তৰা এক অভিযোগৰ পিছতেই ছেবিয়ে শুক্ৰবাৰে এনডিটিভিৰ শীর্ষপদৰ পৰা আঁতৰি যাবলৈ নিৰ্দেশ জাৰি কৰে।  
বর্তমান প্রণয় ৰায়ে  এনডিটিভির এক্সিকিউটিভ ডিৰেক্টৰ চেয়াৰপাৰ্ছন পদত কাৰ্য নিৰ্বাহ কৰি আছে। তেওঁৰ পত্নী ৰাধিকা ৰায় সংস্থাৰ এক্সিকিউটিভ ডিৰেক্টৰ পদত আেছ।। প্রণয় ৰায় আৰু তেওঁৰ পত্নী ৰাধিকা ৰায়ে
কয় যেছেবিৰ এই নির্দেশ ভয়াৱহ, আইনৰ ভুল আৰু বিকৃত প্রয়োগ। ছেবিৰ নির্দেশৰ বিৰুদ্ধে তেওঁলোক আদালতৰ দ্বাৰস্থ হ’ব বুলিও জনায়। ইয়াতে উল্লেখ কৰিব পাৰি যে ২০১৭ চনতো প্রণয়-ৰাধিকাৰ ঘৰ আৰু কাৰ্যালয়ত চিবিআয়ে বিত্তীয় অনিয়মৰ অভিযোগত তালাচী চলাইছিল যদিও আপত্তিজনক বা বেআইনি কোনো তথ্যই পোৱা নাছিল। প্রণয় ৰায় হৈছে দেশৰ টেলিভিশন নিউজ চেনেলৰ পথিকৃৎ।বিৰোধী ৰাজনৈতিক দলবিলাকে অভিযোগ কৰি কয় যে  বিজেপি বিৰোধী বাতৰি সম্প্রচাৰ কৰাৰ কাৰণেই ৰায়ক বাৰে বাৰে হাৰাশাস্তি কৰি থকা হৈছে।