বৰপেটাৰোড প্ৰেছ ক্লাবত গ্ৰন্থ উন্মোচনী অনুষ্ঠান

বৰপেটাৰোডৰ মানাস দৰ্পণ পত্ৰিকা গোষ্ঠীৰ উদ্যোগত দেওবাৰে বৰপেটাৰোড প্ৰেছ ক্লাবত সুগন্ধি পখিলাৰ কবি হীৰুদাক স্মৰণ আৰু মানাস দৰ্পণৰ দ্বাদশ বৰ্ষপূৰ্তিৰ এক বিশেষ অনুষ্ঠানৰ আয়োজন কৰা হয় ৷ মানাস দৰ্পণৰ সভাপতি জীতেন নাথৰ সভাপতিত্বত অনুষ্ঠিত অনুষ্ঠানটো বন্তি প্ৰজ্জ্বালন কৰি শুভউদ্বোধন কৰে বিশিষ্ট কবি ডাঃ হৰেন চৌধুৰীয়ে ৷ বৰপেটাৰোড পৌৰসভাৰ সভানেত্ৰী সবিতা দেৱনাথে বিশিষ্ট অতিথি হিচাপে উপস্থিত থকা অনুষ্ঠানটোত অধ্যাপক ডঃ হেমন্ত ডেকাই নিৰ্দিষ্ট বক্তাৰ বক্তব্য আগবঢ়ায় ৷

অনুষ্ঠানত হীৰুদাৰ স্মৃতিত 'ঐক্যতান' নামৰ এখনি কবিতা সংকলন আৰু মানাস দৰ্পণৰ দ্বাদশ বৰ্ষৰ প্ৰথম সংখ্যাটি উন্মোচন কৰা হয় ৷ মানাস দৰ্পণ পত্ৰিকা গোষ্ঠীৰ সম্পাদক সমীৰ চক্ৰৱৰ্তীয়ে আঁতধৰা অনুষ্ঠানটোত কবি ধ্ৰুৱ তালুকদাৰৰ সঞ্চালনাত এখনি কবি সন্মিলনৰো আয়োজন কৰা হয় ৷ উক্ত কবি সন্মিলনত বৰপেটা জিলাৰ বিভিন্ন প্ৰান্তৰ পৰা অহা কবিসকলে স্বৰচিত কবিতা পাঠ কৰি অনুষ্ঠানটো জীপাল কৰি তোলে ৷