কিয় আব্দুল খালেকক লক্ষ্য কৰি ল'লে গৰিয়া-মৰীয়া দেশী জাতীয় পৰিষদে ?

 চেঙাৰ পৰা সুৰজিৎ পাঠক

বৰপেটা জিলাৰ চেঙাত  সদৌ অসম গৰিয়া-  মৰীয়া দেশী জাতীয়  পৰিষদে এখন  সংবাদমেল অনুষ্ঠিত কৰে। ৰোহিঙীয়া আনিব বিচৰা ৰাজনৈতিক নেতাই গৰিয়া- মৰীয়া দেশী জাতীয়  পৰিষদৰ জনগোষ্ঠীয় পৰিচয় পোৱাত বাধাৰ সৃষ্টি  কৰিব বিচৰা বুলি সংবাদমেলত অভিযোগ  উত্থাপন  কৰে  গৰিয়া-মৰীয়া দেশী  জাতীয় পৰিষদৰ  সভাপতি হাফিজুল আহমেদে।

যোৱা ১৫  এপ্ৰিলত চেঙাত এটি নিৰ্বাচনী কাৰ্যালয় মুকলি কৰি গৰিয়া-  মৰীয়া দেশী জাতীয় পৰিষদৰ বিৰুদ্ধে  বিৰূপ মন্তব্য  কৰা এগৰাকী  প্ৰাৰ্থীক লক্ষ্য  কৰি  গৰিয়া-মৰীয়া দেশী জাতীয় পৰিষদে বুধবাৰে  সকিয়নী প্ৰদান কৰে। ৰোহিঙীয়া আনিব  বিচৰা ৰাজনৈতিক নেতা বুলি  কংগ্ৰেছ প্ৰক্ষেপিত প্ৰাৰ্থী  আব্দুল খালেককে সংবাদমেলত লক্ষ্য কৰি লৈছিল গৰিয়া-মৰীয়া দেশী জাতীয় পৰিষদে ।

এই সংবাদমেলত হাফিজুল  আহমেদে পুনৰ কয় যে খিলঞ্জীয়া  বিৰোধী মন্তব্য কৰা নেতাক অসমৰ গৰিয়া-মৰীয়া দেশী জাতিয়ে  চিনিছে। আনহাতে  অসমৰ সৰ্বত্ৰে  বঞ্চিত  গৰিয়া-মৰীয়া দেশী জাতিক  জনগোষ্ঠীৰ পৰিচয়  দিব বিচৰা ৰাজনৈতিক দল তথা প্ৰাৰ্থীকে সদৌ অসম গৰিয়া-মৰীয়া দেশী জাতীয় পৰিষদে ভোট দিবলৈ ৰাইজক আহ্বান  জনায় ।