স্বচ্ছ সৰ্বেক্ষণৰ কাৰ্যসূচীৰ সময়তে ধুবুৰী জিলা উপায়ুক্ত কাৰ্যালয় কদৰ্য ৰূপ

ৰাজ্যৰ ভিন্ন অঞ্চলৰ লগতে ধুবুৰী জিলাতো আৰম্ভ হল স্বচ্ছ সৰ্বেক্ষণ গ্ৰামীণ-২০১৮ অভিযান । আজি ধুবুৰী জিলা উপায়ুক্তৰ কাৰ্যালয়ৰ সন্মুখৰ পৰা জিলা উপায়ুক্তই স্বচ্ছতাৰ বিশেষ ৰথৰ ফ্লেগ-অফ কৰে ।

কিন্তু স্বচ্ছ ভাৰত অভিযান উপলক্ষে ধুবুৰীত পূৰ্বে এনে বহু কাৰ্যসূচী লোৱা হৈছিল যদিও বাস্তৱত তাৰ ফলাফল শূন্য । ইয়াৰ প্ৰমাণ আজি আমাৰ কেমেৰাত বন্দী হোৱা স্বয়ং জিলা উপায়ুক্তৰ কাৰ্যালয়ৰ কদৰ্যময় পৰিৱেশৰ ছবি ৷

জিলা উপায়ুক্তৰ কাৰ্যালয়ৰ ভিতৰচৰাত ক'ৰবাত যদি লেতেৰা পানী জমা হৈ আছে, আন ক'ৰবাত আকৌ দমে দমে পৰি আছে জাবৰ । দীৰ্ঘ দিনৰে পৰা এইদৰে পৰি আছে জাবৰ আৰু গেলা-পচা আৱৰ্জনা । ফলত দুৰ্গন্ধময় পৰিবেশৰ মাজেৰে কৰ্তব্য পালন কৰিবলগা হৈছে বিষয়া-কৰ্মচাৰীসকলে ।

উল্লেখ্য যে চৰকাৰে স্বচ্ছতাৰ নামত বিভিন্ন আঁচনিৰ জৰিয়তে বিভিন্ন কাৰ্যসূচী ৰূপায়ণ কৰি কোটি কোটি টকা খৰচ কৰিছে যদিও কিমানদূৰ সফল হৈছে সেয়া জিলা উপায়ুক্তৰ কাৰ্যালয়ৰ এই বাস্তৱ ছবিয়েই প্ৰমাণ কৰিছে ।