সোণাৰিত মহাবিদ্যালয়ৰ অধ্যক্ষৰ অন্ধবিশ্বাস, গে'টত পুতিলে মন্ত্ৰপুত সামগ্ৰী

সোণাৰি বাণিজ্য মহাবিদ্যালয়ৰ অধ্যক্ষৰ আজৱ কাণ্ড ৷ এজন ডক্টৰেট ডিগ্ৰীধাৰী অধ্যক্ষই অন্ধবিশ্বাস আৰু কু-সংস্কাৰৰ বলি হৈ কৰিলে এই কাণ্ড ৷ যাৰবাবে এতিয়া সমগ্ৰ অঞ্চলটোতে সৃষ্টি হৈছে তীব্ৰ চাঞ্চল্য ৷ ঘটনাৰ বিৱৰণী মতে, অধ্যক্ষগৰাকীয়ে মহাবিদ্যালয়খনৰ গে'টত পোতে মন্ত্ৰপুত সামগ্ৰী৷ অধ্যক্ষগৰাকীৰ দাবী- মহাবিদ্যালয়খনৰ ভালৰ বাবেই তেওঁ গে'টৰ সন্মুখত এজন তান্ত্ৰিক-সন্যাসীৰ সহায়ত পুতিছে মন্ত্ৰপুত সামগ্ৰী ।

আনহাতে, মহাবিদ্যালয়খনৰ একাংশ প্ৰাক্তন আৰু বৰ্তমানৰ ছাত্র-ছাত্ৰীয়ে ইয়াৰ তীব্ৰ প্ৰতিক্ৰিয়া প্ৰকাশ কৰি কয় যে অধ্যক্ষগৰাকীয়ে মহাবিদ‍্যালয়খনত সংঘটিত কৰা দুৰ্নীতিৰ কু-কাণ্ড পৰিচালনা সমিতিৰ সন্মুখত প্ৰবক্তাসকলে ফাদিল কৰাৰ পাছত এই আশ্চৰ্যকৰ কাণ্ড সংঘটিত কৰিছে । চি চি টিভিৰ কেমেৰাত অধ্যক্ষগৰাকীয়ে সংঘটিত কৰা সমগ্ৰ কাণ্ড বন্দী হোৱাৰ লগতে সমস্ত কাৰ্য পোহৰলৈ অহাৰ পাছত এতিয়া সমগ্ৰ সোণাৰিত তীব্ৰ প্ৰতিক্ৰিয়াৰ সৃষ্টি হৈছে ।

উল্লেখ্য যে অধ্যক্ষগৰাকীয়ে তান্ত্ৰিককৰ সহায়ত দহজন অধ্যাপক আৰু এজন চতুৰ্থবৰ্গৰ কৰ্মচাৰীৰ নাম লিখি অন্ধবিশ্বাসৰ বশৱৰ্তী হৈ মহাবিদ্যালয়খনৰ গে'টৰ সন্মুখত মন্ত্ৰপুত সামগ্ৰী মাটিত থৈছিল ৷ সমগ্ৰ দৃশ্য পোহৰলৈ অহাত বৃহস্পতিবাৰে বৰ্তমানৰ আৰু প্ৰাক্তন ছাত্ৰ-ছাত্ৰীসকলে অধ্যক্ষগৰাকীৰ নিলম্বনৰ মহাবিদ্যালয়ত দাবীত তলা বন্ধ কৰি পৰিস্থিতি উত্তপ্ত কৰি তোলে ।