বৰপেটাৰ তাৰাবাৰীত বাল্যবিবাহ, কইনাৰ পিতৃ আৰু কাজীক গ্ৰেপ্তাৰ

বৰপেটা জিলাৰ তাৰাবাৰী আৰক্ষী থানাৰ অন্তৰ্গত কলতলি গাঁৱত যোৱা ২৩ জুলাইত সংঘটিত হৈছিল এক বাল্যবিবাহৰ ঘটনা । কলতলি গাঁৱৰ এগৰাকী চৈধ্য বছৰীয়া কিশোৰীৰ স'তে নলবাৰী জিলাৰ ঘগ্ৰাপাৰ আৰক্ষী থানাৰ অন্তৰ্গত আগদলা গাঁৱৰ ওচমান আলীৰ পুত্ৰ মহিদুল আলীৰ স'তে বিবাহ সম্পন্ন হৈছিল ।

উক্ত বাল্যবিবাহৰ লগত জড়িত থকাৰ অভিযোগত বুধবাৰে নিশা তাৰাবাৰী আৰক্ষী থানাৰ ভাৰপ্ৰাপ্ত আৰক্ষী বিষয়া মুনীন্দ্ৰ নাৰায়ণ দাসৰ নেতৃত্বত যোৱা আৰক্ষীৰ এটি দলে অভিযান চলাই দুগৰাকী লোকক আটক কৰিবলৈ সক্ষম হয় । আটক হোৱা লোক দুগৰাকী ক্ৰমে কলতলি গাঁৱৰ বাল্যবিবাহৰ বলি হোৱা কিশোৰীগৰাকীৰ পিতৃ নুৰ ইছলাম আলী আৰু বাল্যবিবাহ সম্পন্ন কৰা ফুলবাৰী গাঁৱৰ কাজী তৈবুল্লাহ খান বুলি জানিব পৰা গৈছে ।

তাৰাবাৰী আৰক্ষী থানাত ৰুজু হোৱা ১৮২/১৮ নম্বৰ গোচৰ আৰু বাল্যবিবাহ প্ৰতিৰোধ আইনৰ ৯/১০/১১ ধাৰাৰ অধীনত আজি তাৰাবাৰী আৰক্ষীয়ে বাল্যবিবাহৰ লগত জড়িত থকাৰ অভিযোগত গ্ৰেপ্তাৰ কৰা ব্যক্তি দুগৰাকীক আদালতলৈ প্ৰেৰণ কৰে । উল্লেখ্য যে বাল্যবিবাহ সম্পন্ন হোৱাৰ পিছতেই দৰা মহিদুল আলীক তাৰাবাৰী আৰক্ষীয়ে গ্ৰেপ্তাৰ কৰি আদালতত হাজিৰ কৰোৱাত মহামান্য আদালতে জে'ললৈ প্ৰেৰণ কৰিছিল । বাল্যবিবাহৰ বিৰুদ্ধে তাৰাবাৰী আৰক্ষীৰ সাহসী পদক্ষেপক সচেতন মহলে ভূয়সী প্ৰশংসা কৰিছে ।