নগাঁৱৰ ৰজাগাঁৱত চাঞ্চল্যকৰ অপহৰণ কাণ্ড 

কামপুৰৰ পৰা বিশেষ প্ৰতিনিধি
বন্দুক দেখুৱাই কিশোৰী অপহৰণ কৰিলে দূৰ্বৃত্তই ৷নগাঁৱৰ কচুৱা আৰক্ষী থানাৰ অন্তৰ্গত শিঙিমাৰী ৰজাগাঁৱৰ সংঘটিত হৈছে এক চাঞ্চল্যকৰ অপহৰণ কাণ্ড ৷ অষ্টম শ্ৰেণীৰ এগৰাকী ছাত্ৰীক নিশা ৰজাগাঁৱৰ খুৰাকৰ ঘৰৰ পৰা পিষ্টল দেখুৱাই এটা দূৰ্বৃত্তৰ দলে অপহৰণ কৰি নিয়া ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে ৷

জানিব পৰা মতে কাৰ্বি আংলং জিলাৰ আমট্ৰেঙৰ হৰিকান্ত টেৰণ নামৰ যুৱকজনে ১২/১৫ জনীয়া এটা বন্দুকধাৰী দলক লগত লৈ দেওবাৰে নিশা ৰজাগাঁৱৰ সন্তোষ ৰায় ঘৰত অনাধিকাৰ প্ৰকাশ কৰি বন্দুক দেখুৱাই ভাবুকি দি বিছনাত শুই থকা কিশোৰীগৰাকীক চোঁচৰাই লৈ যায় ৷

কিশোৰীগৰাকীক চোঁচৰাই নিওতে বাধা দিয়া পৰিয়ালটোৰ চাৰিগৰাকী মহিলাকো দুষ্কৃতিকাৰী দলটোয়ে শাৰীৰিকভাৱে প্ৰহাৰ কৰে৷ অস্ত্ৰধাৰী যুৱকৰ দলটোয়ে কিশোৰীগৰাকীক বলপূৰ্বকভাৱে এএছ ০২এল-৭২৬০ নম্বৰৰ চাৰিচকীয়া গাড়ীত উঠাই অপহৰণ কৰি নিয়ে ৷

ঘটনা সন্দৰ্ভত পৰিয়ালৰ লোকে কচুৱা আৰক্ষী থানাত এজাহাৰ দাখিল কৰিছে ৷ আৰক্ষীয়ে ৫৩/১৯ ইউ/এছ ৩৬৬এ/৩৪ আইপিচি নম্বৰত এক গোচৰ ৰুজু কৰি বৰ্তমান অপহৰনকাৰী সন্ধানত তদন্ত আৰম্ভ কৰিছে৷ যদিও কিশোৰীগৰাকীক কি কাৰণত অপহৰণ কৰিলে সেয়া পোহৰলৈ অহা নাই যদিও প্ৰেম জনিত কাৰণত এই ঘটনা সংঘটিত হোৱা বুলি আৰক্ষীয়ে সন্দেহ প্ৰকাশ কৰিছে ৷