হিমা দাস আৰু মেৰী কম ভাৰতীয় ক্ৰীড়া সন্মান, ২০১৯ৰ বাবে মনোনীত

আজি মুম্বাইত ভাৰতীয় ক্ৰীড়া সন্মানৰ দ্বিতীয় সংস্কৰণ অনুষ্ঠিত হ'ব৷ ক্ৰিকেটাৰ বিৰাট কোহলী আৰু ব্যৱসায়ী সঞ্জীৱ গোৱেংকাৰ উদ্যোগত বিগত বৰ্ষৰ পৰা আৰম্ভ হৈছে এই ভাৰতীয় ক্ৰীড়া সন্মান প্ৰদানৰ অনুষ্ঠান৷ দেশৰ বিভিন্ন ক্ৰীড়া ক্ষেত্ৰত লাভ কৰা সফলতা, প্ৰদৰ্শন আৰু অৱদানৰ বাবে ক্ৰীড়াবিদসকললৈ এই সন্মান প্ৰদান কৰা হয়৷

এইবছৰ মেৰী কম আৰু হিমা দাস "স্পৰ্টছ উইমেন অব্‌ দ্য ইয়েৰ (ব্যক্তিগত)" শাখাৰ বাবে মনোনীত হৈছে৷ উল্লেখ্য যে মুঠ ১৭টা বিভাগৰ ১১টাৰ বাবে মনোনীত ক্ৰীড়াবিদৰ নাম শুকুৰবাৰে ঘোষণা কৰা হয়৷ আনহাতে, বাকী ছয়টা বিভাগৰ বাবে মনোনীত ক্ৰীড়াবিদৰ নাম পূৰ্বতে ঘোষণা কৰা হৈছিল৷