সকলোকে লগত লৈ এক নতুন ধৰণৰ ৰাজনীতি আৰম্ভ কৰিব প্ৰিয়ংকাই

কংগ্ৰেছৰ সাধাৰণ সম্পাদকৰ দায়িত্ব গ্ৰহণ কৰি উত্তৰ প্ৰদেশলৈ ৰাওনা হোৱাৰ পূৰ্বে এটা অডিঅ' বাৰ্তাত গুৰুত্বপূৰ্ণ বক্তব্য ৰাখিলে প্ৰিয়ংকা গান্ধীয়ে৷ উত্তৰ প্ৰদেশৰ সকলো জনসাধাৰণক লগত লৈ এক নতুন ধৰণৰ ৰাজনীতি আৰম্ভ কৰিব বুলি বক্তব্য ৰাখি সহযোগ কৰিবৰ বাবে ৰাইজলৈ আহ্বান জনায়৷

অডিঅ' বাৰ্তাটোত প্ৰিয়ংকাই কয়- "নমস্কাৰ, মই প্ৰিয়ংকা গান্ধী ৱাদ্ৰা৷ আপোনালোকক লগ পাবলৈ মই লক্ষ্ণৌলৈ আহিছোঁ৷ আমাৰ আশা, সকলোৱে মিলি ঐক্যবদ্ধভাৱে এক নতুন ধৰণে ৰাজনীতি আৰম্ভ কৰিব পাৰিম৷" নতুন ধৰণৰ ৰাজনীতি বুলি কৈ প্ৰিয়ংকা গান্ধীয়ে প্ৰকৃতাৰ্থত স্পষ্ট কৰি দিছে যে এই ৰাজনীতিত তৰুণ প্ৰজন্ম, যুৱতী তথা মহিলাসকলৰ লগতে অতি দুৰ্বল শ্ৰেণীৰ মতামতক লৈ আগবঢ়া হ'ব৷

প্ৰিয়ংকাই কয়- "আহক, সকলোৱে মিলি আমাৰ লগত যোগ দিয়ক আৰু দেশৰ এক নতুন ভৱিষ্যৎ গঢ়ি তোলক৷" ইতিমধ্যেই অডিঅ' বাৰ্তাটো দেশৰ ৩০ লাখ মানুহৰ কৰ্ণগোচৰ হৈছে৷ প্ৰিয়ংকাৰ ৰাজনৈতিক পথাৰত প্ৰথম খোজত উত্তৰ প্ৰদেশলৈ তেওঁক সংগ দিছে কংগ্ৰেছৰ সভাপতি ৰাহুল গান্ধী আৰু আন এগৰাকী নতুনকৈ সাধাৰণ সম্পাদকৰ দায়িত্বভাৰ গ্ৰহণ কৰা জ্যোতিৰাদিত্যই৷