বিৰাট বিক্ৰম অব্যাহত : ১০ বছৰৰ মূৰত নিউজীলেণ্ডৰ মাটিত এদিনীয়া শৃংখলা দখল বিৰাট বাহিনীৰ

নিউজীলেণ্ডত চলি থকা পাঁচখনীয়া নেটমেডছ এদিনীয়া শৃংখলাত আজি তৃতীয়খন এদিনীয়াত ভাৰতে নিউজীলেণ্ডক ৭ উইকেটত পৰাস্ত কৰি ৩-০ৰ অগ্ৰগতিৰে শৃংখলা হস্তগত কৰে৷ উল্লেখ্য যে ২০০৯ চনৰ পিছত নিউজীলেণ্ডৰ মাটিত ভাৰতৰ এয়া প্ৰথন এদিনীয়া শৃংখলা দখল৷ আজি ঘৰুৱা দলটোৱে পোনতে বেটিং কৰি ৪৯ অ'ভাৰত আটাইকেইটা উইকেটৰ বিনিময়ত ২৪৩ ৰাণ সংগ্ৰহ কৰে৷ নিউজীলেণ্ডৰ হৈ ৰ'ছ টেইলৰে ৯৩ ৰাণ আৰু লাথানে ৫১ ৰাণৰ বৰঙণি আগবঢ়ায়৷

মহম্মদ ছামীয়ে ৪১ ৰাণৰ বিনিময়ত ৩টা উইকেট লাভ কৰে৷ আনহাতে, নিষেধাজ্ঞাৰ পিছত ভাৰতীয় দললৈ ওভতা হাৰ্দিক পাণ্ডিয়াই ৪৫ ৰাণত ২টা, ভুৱনেশ্বৰ কুমাৰে ৪৬ ৰাণত ২টা আৰু যযুবেন্দ্ৰ চহলে ৫১ ৰাণৰ বিনিময়ত ২টা উইকেট লাভ কৰে৷ ভাৰতীয় দলৰ হৈ ৰোহিত শৰ্মাই সৰ্বাধিক ৬২ ৰাণৰ বৰঙণি আগবঢ়ায়৷ এয়া আছিল এদিনীয়া ক্ৰিকেটত ৰোহিতৰ ৩৯সংখ্যক অৰ্ধ-শতক৷ আনহাতে, কেৰিয়াৰৰ ৪৯সংখ্যক অৰ্ধ-শতকেৰে অধিনায়ক বিৰাট কোহলীয়ে দললৈ ৬০ ৰাণৰ বৰঙণি আগবঢ়ায়৷

উল্লেখ্য যে দ্বিতীয় উইকেটৰ যুটীত কোহলী-ৰোহিতে ১১৩ ৰাণৰ বৰঙণি আগবঢ়াই দলৰ বিজয়ৰ ভেটি মজবুত কৰে৷ ৰাইডুৱে ৪০ আৰু দীনেশ কাৰ্তিকে ৩৮ ৰাণত অপৰাজিত হৈ থাকে৷ নিউজীলেণ্ডৰ হৈ ট্ৰেণ্ট ব'ল্টে ৪০ ৰাণত ২টা আৰু ষ্টাণ্টনাৰে ৪৯ ৰাণ খৰচ কৰি ১টা উইকেট দখল কৰে৷