তামুলপুৰত ভাৰতীয় জাতীয় কংগ্ৰেছৰ ১৩৪ সংখ্যক প্ৰতিষ্ঠা দিৱস উদ্‌যাপন

ভাৰতীয় জাতীয় কংগ্ৰেছৰ অসম ৰাজ্যিক সমিতিৰ অন্তৰ্গত বাক্সা জিলা সমিতিৰ উদ্যোগত আজি তামুলপুৰ ব্লক কংগ্ৰেছৰ কাৰ্যালয় প্ৰাংগণত দিনজোৰা কাৰ্যসূচীৰে ভাৰতীয় জাতীয় কংগ্ৰেছৰ ১৩৪ সংখ্যক প্ৰতিষ্ঠা দিৱস উদ্‌যাপন কৰা হয় ৷ তদুপলক্ষে পুৱা দলৰ পতাকা উত্তোলন কৰে বাক্সা জিলা সভাপতি ধীৰাজ ডেকাই৷

দিনৰ এঘাৰ বজাত জিলা সভাপতি ধীৰাজ ডেকাৰ সভাপতিত্বত অনুষ্ঠিত হয় সাধাৰণ সভা৷ সভাত অসম প্ৰদেশ কংগ্ৰেছ দলৰ সাঃ সম্পাদক শব্দ ৰাভা, প্ৰবীণ কংগ্ৰেছ নেতা তথা অসম চৰকাৰৰ প্ৰাক্তন মন্ত্ৰী পদ্ম বাহাদুৰ চৌহান অতিথি হিচাপে উপস্থিত থাকে৷ সভাত দুয়োগৰাকী নেতাই ভাৰতীয় জাতীয় কংগ্ৰেছৰ সাংগঠনিক ভেটিৰ ওপৰত বক্তব্য ৰখাৰ উপৰি ভাৰতীয় জাতীয় কংগ্ৰেছৰ কাম-কাজ আৰু সাম্প্ৰতিক সময়ত দলটোৰ প্ৰাসংগিকতা সম্পৰ্কত সাৰুৱা ভাষণ ৰাখে৷

বাক্সা জিলা কংগ্ৰেছৰ সাঃ সম্পাদক হুছেইন আলীয়ে সভাৰ উদ্দেশ্য বহলাই কয়। আজিৰ সভাতে চক্ৰধৰ কোঁৱৰ (নাওকাটা), জাকিৰ হুছেইন (চাপাতল), পাৱন দাস (কালাকুছি) আৰু দক্ষিণ কুমাৰীকাটাৰ সুশীল দাসে কংগ্ৰেছ দলত আনুষ্ঠানিকভাৱে যোগাদন কৰে৷ সভাত কংগ্ৰেছ দলৰ তৰফৰ পৰা চাৰিওজনকে উষ্ম আদৰণি জনায়৷

ইপিনে ভাৰতীয় জাতীয় কংগ্ৰেছৰ প্ৰতিষ্ঠা দিৱসত বাক্সা জিলাৰ তামুলপুৰ, জালাহ, ধমধমা, বৰমা, নাগ্ৰীজুলি, গোৱৰ্ধনা, গোৰেশ্বৰ আদিকে কৰি আঠোটা ব্লক কংগ্ৰেছৰ সভাপতি-সম্পাদক প্ৰমুখ্যে সদস্যসকল উপস্থিত থাকে৷