এ পি এছ চিত উত্তীৰ্ণ জেংৰাইমুখৰ সিদ্ধাৰ্থ দলেক সম্বৰ্ধনা

মাজুলীৰ পৰা ৰাজীৱ পাতিৰ

২০১৬-১৭ বৰ্ষৰ অসম লোকসেৱা আয়োগ চমুকৈ এ পি এছ চিত সুখ্যাতিৰে উৰ্ত্তীৰ্ণ হোৱা মাজুলীৰ জেংৰাইমুখৰ সু-সন্তান সিদ্ধাৰ্থ দলেক বৰপমুৱা গাঁও উন্নয়ন সমিতি আৰু যুৱক সংঘই আজি আনুষ্ঠানিকভাৱে উষ্ণ সম্বৰ্ধনা জনায় ।

জেংৰাইমুখ বৰপমুৱা ৰংগমঞ্চত অনুষ্ঠিত এই সম্বৰ্ধনা অনুষ্ঠানত বৰপমুৱা নিবাসী তথা শিক্ষক বগাৰাম দলে আৰু স্বৰলা দলেৰ কনিষ্ঠ পুত্ৰ, কৃতী শিক্ষাৰ্থী সিদ্ধাৰ্থ দলেক সম্বৰ্ধনা-পত্ৰ, মিচিং মাপলাৰ, ফুলাম গামোচা, ফুলৰ থোপাৰে বৰপমুৱা গাঁও উন্নয়ন সমিতি, যুৱক সংঘ, টি এম এম কে, জেংৰাইমুখ আঞ্চলিক সমিতি, জেংৰাইমুখ শিক্ষক সমাজ, কুমাৰবাৰী গাঁও উন্নয়ন সমিতি, জেংৰাইমুখ মহিলা সজাগতা ভাৰতীয় জনতা পাৰ্টী,

জেংৰাইমুখ কাৰপুলি আত্মসহায়ক গোট আদি বিভিন্ন দল-সংগঠনৰ লগতে বিভিন্নগৰাকী শুভাকাংক্ষীয়ে সন্মান জনাই তেওঁৰ ভৱিষ্যৎ কৰ্মজীৱনৰ আশীৰ্বাদ প্ৰদান কৰে ।

ৰাষ্ট্ৰীয় সংগীতেৰে আৰম্ভ হোৱা সম্বৰ্ধনা অনুষ্ঠানত সভাপতিত্ব কৰে বৰপমুৱা গাঁও উন্নয়ন সমিতিৰ সভাপতি প্ৰদীপ দলেই । ৰাজ্যৰ স্বাস্থ্য বিভাগৰ অৱসৰপ্ৰাপ্ত স্বাস্থ্য সঞ্চালক ডাঃ বিশ্বেশ্বৰ পেগুৱে উদ্বোধন কৰা অনুষ্ঠানত মুখ্য অতিথি হিচাপে মিচিং মিমাগ কেবাং কেন্দ্ৰীয় সমিতিৰ সাধাৰণ সম্পাদক প্ৰেমধৰ দলে, বিশিষ্ট অতিথি হিচাপে ক্ৰমে বিশিষ্ট সমাজ কৰ্মী আছিৰাম দলে, যজ্ঞেশ্বৰ দলে,

জেংৰাইমুখ মহাবিদ্যালয়ৰ অধ্যাপক জয়সিং দলে, ৰেঙাম হাইস্কুলৰ প্ৰধান শিক্ষক কৰ্নেশ্বৰ দলে, সাংবাদিক ৰাজীৱ পাতিৰ, শিক্ষক অশ্বিনী দলে, নিপন দলে, বগাৰাম দলে, কল্যাণ দলে, টি এম এম কে কেন্দ্ৰীয় সমিতিৰ কাৰ্যনিৰ্বাহ সদস্যা ইলাজ্যোতি কুম্বাং আদি বিশিষ্ট নাগৰিকসকল উপস্থিত থাকি এ পি এছ চি সিদ্ধাৰ্থ দলেই বৃহত্তৰ জেংৰাইমুখ অঞ্চললৈ কঢ়িয়াই অনা সুনামৰ বাবে কৃতজ্ঞতা জনোৱাৰ লগতে নৱপ্ৰজন্মৰ বাবে কাম কৰিবলৈ আহ্বান জনায় ।

এ পি এছ চিৰ দৰে প্ৰতিযোগিতামূলক পৰীক্ষাবোৰত অৱতীৰ্ণ হ'ব বিচৰা শিক্ষাৰ্থীসকলৰ বাবে প্ৰয়োজনীয় প্ৰশিক্ষণ আগবঢ়াবলৈ প্ৰস্তুত বুলি মত প্ৰকাশ কৰে সিদ্ধাৰ্থ দলেয়ে ।

অনুষ্ঠান আঁতধৰে বৰপমুৱা গাঁও উন্নয়ন সমিতিৰ সম্পাদক বিলনাথ দলেয়ে । উল্লেখ্য যে সিদ্ধাৰ্থ দলে এ পি এছ চিত উত্তীৰ্ণ হৈ সমবায় সমিতিসমূহৰ সহকাৰী পঞ্জীয়ক হিচাপে নিযুক্তি লাভ কৰিছে ।