লংকাৰ কাকীত সক্ৰিয় নাৰী সৰবৰাহকাৰী চক্ৰ : সন্তানসহ মহিলা নিখোজ

লংকাৰ পৰা মনোজ কুমাৰ পাঠক

হোজাই জিলাৰ লংকাৰ কাকীত সক্ৰিয় হৈ উঠিছে নাৰী সৰবৰাহকাৰী চক্ৰ ৷ এই নাৰী সৰবৰাহকাৰীৰ কবলত পৰি এগৰাকী মহিলা কাকীৰ পুৰণাকাকী ওদালগুৰিৰ পৰা নিখোজ হোৱা ঘটনাই অঞ্চলজুৰি চাঞ্চল্যৰ সৃষ্টি কৰিছে ৷

জানিব পৰা মতে, কাকী ওদালগুৰিৰ মহেন্দ্ৰ ৰাভাৰ ২৭ বছৰীয়া পত্নী এগৰাকী ছয় বছৰীয়া কন্যা সন্তানসহ যোৱা ২৮ নৱেম্বৰৰ পৰা নগাঁৱলৈ ফুৰিবলৈ যোৱাৰ পৰা সন্ধানহীন হৈ আছে ৷

ইফালে স্বামী মহেন্দ্ৰ ৰাভাই জানিবলৈ দিয়া মতে, কাকী আই লাভ ইউ চেণ্টাৰৰ মহেন বসুমতাৰী নামৰ এজন লোকে কৰ্মসংস্থাপন দিম বুলি তেওঁৰ পত্নী কল্পনা ৰাভাক ফুচুলাই মায়ানগৰী মুম্বাইলৈ গৈছে আৰু তাত কোনো লোকৰ হাতত বিক্ৰী কৰাৰ সন্দেহ প্ৰকাশ কৰিছে ৷

উল্লেখ্য যে অঞ্চলটোৰ বিভিন্ন অসামাজিক কৰ্মত জড়িত মহেন বসুমতাৰীয়ে কাৰ্বি আংলং জিলাৰ দেন গাঁৱৰ পৰা ইয়াৰ পূৰ্বেও কেইবাগৰাকী যুৱতী-মহিলাক কৰ্মসংস্হাপন দিম বুলি বহিঃৰাজ্য কেৰালাত কোনো অজ্ঞাত লোকৰ হাতত গতাই থৈ আহিছিল ৷

ঘটনা সন্দৰ্ভত মহেন্দ্ৰ ৰাভাই কাকী আৰক্ষী থানাত এজাহাৰ দাখিল কৰিছে যদিও আৰক্ষীয়ে কোনো গুৰুত্ব নিদিয়াৰ অভিযোগ উঠিছে ৷