তামুলপুৰত এন ডি এফ বি সদস্য আটক 

বাক্সা জিলাৰ তামুলপুৰ আৰক্ষী থানাৰ অন্তৰ্গত কুমাৰীকাটা আৰক্ষী চকীৰ অধীনৰ শশীপুৰত সোমবাৰে পিষ্টলসহ এজন এন ডি এফ বি (স) সদস্য আটক হোৱাত সমগ্ৰ মহকুমাজুৰি চাঞ্চল্যৰ সৃষ্টি হৈছে ।

আৰক্ষী সূত্ৰে জানিব পৰামতে, গোপন সূত্ৰৰ পম খেদি সেনাবাহিনীৰ ৫ জি আৰ গোৰ্খা ৰেজিমেণ্ট আৰু আৰক্ষীয়ে অভিযান চলাই শশীপুৰ গাঁৱৰ পৰা হাৰ্কীলাছ নাৰ্জাৰী (২৫) ওৰফে এন হাছঠাই নামৰ এন ডি এফ বি (স)ৰ সদস্যজনক কৰায়ত্ত কৰে ।

ধৃত সদস্যজনৰ পৰা ৭.৬ পিষ্টল, এটা মেগজিনসহ তিনিজাঁই সজীৱ গুলী উদ্ধাৰ কৰে । ধৃত কেডাৰজনৰ ঘৰ কোকৰাঝাৰ জিলাৰ গোসাইগাঁও আৰক্ষী থানাৰ অন্তৰ্গত কচুবিলত বুলি জানিব পৰা গৈছে ।

সোমবাৰে পুৱাৰ ভাগত ভাৰত-ভূটান সীমান্তৰ শশীপুৰত ক'ৰবালৈ যাবলৈ অপেক্ষা কৰি থাকোঁতে সেনা-আৰু আৰক্ষীয়ে কৰায়ত্ত কৰে কেডাৰজনক ৷ ম্যানমাৰত দুমাহ প্ৰশিক্ষণ লোৱা কেডাৰজনৰ পৰা অধিক তথ্য সংগ্ৰহৰ বাবে আৰক্ষীয়ে জেৰা অব্যাহত ৰাখিছে ৷