কৃষকৰ সমস্যা সমাধানৰ দাবীত লক্ষাধিক কৃষকে কঁপাইছে দিল্লী

কৃষকসকলৰ সমস্যা সমাধানৰ বাবে অখিল ভাৰতীয় কিষাণ সংঘৰ্ষ সমন্বয় সমিতিৰ উদ্যোগত "দিল্লী চলো" আন্দোলনৰ কাৰ্যসূচীৰ অংশ হিচাপে দিল্লীত সমবেত হৈছে দেশৰ বিভিন্ন ৰাজ্যৰ লক্ষাধিক কৃষক ৷

বৃহস্পতিবাৰেই দেশৰ বিভিন্ন প্ৰান্তৰ পৰা ৰাওনা হোৱা কৃষকসকলে দিল্লীৰ ৰামলীলা ময়দানত এক সমাবেশত সমবেত হয় ৷ আজি ৰামলীলা ময়দানৰ পৰা প্ৰতিবাদকাৰীসকলে সংসদ ভৱন অভিমুখে পদযাত্ৰা কাৰ্যসূচীত অংশ লৈছে ৷

উল্লেখ্য যে কেন্দ্ৰীয় চৰকাৰে কৃষকসকলৰ সমস্যা সমাধানত কোনো ধৰণৰ গুৰুত্ব প্ৰদান নকৰাৰ বাবে দেশৰ বিভিন্ন প্ৰান্ত বহুসংখ্যক কৃষকে আত্মহত্যাৰ পথ বাছি ল'বলগা হৈছে ৷

সেয়েহে কৃষকসকলৰ সমস্যাসমূহক কেন্দ্ৰ কৰিয়ে দেশৰ কৃষিৰ লগত জড়িত বহুকেইটা সংগঠন একত্ৰিত হৈ এই সমূহীয়া প্ৰতিবাদী কাৰ্যসূচী  গ্ৰহণ কৰিছে ৷

অখিল ভাৰতীয় কিষাণ সংঘৰ্ষ সমন্বয় সমিতিৰ দাবী- কৃষকসকলৰ গুৰুত্বপূৰ্ণ সমস্যাসমূহৰ ওপৰত আগন্তুক সংসদৰ শীতকালীন অধিবেশনত কেন্দ্ৰীয় চৰকাৰে আলোচনা কৰি সিদ্ধান্ত গ্ৰহণ কৰক ৷

উল্লেখ্য যে কৃষকসকলৰ এই আন্দোলনত চৰকাৰবিৰোধী বহুতো নেতায়ো অংশগ্ৰহণ কৰিছে ৷