মৰিকলং বকুলতল নামঘৰৰ পুনৰ প্ৰতিষ্ঠা দিৱসৰ সামৰণি

নগাঁৱৰ পৰা ৱাহিদুদ জামান

মহাপুৰুষ শ্ৰীমন্ত শংকৰদেৱে অসমীয়া জাতিলৈ আগবঢ়াই যোৱা অবদান অদ্বিতীয় আৰু অসাধাৰণ ।" এই মন্তব্য বিশিষ্ট চিন্তাবিদ ময়ূৰ বৰাৰ । সোমবাৰে সন্ধ্যা মৰিকলং বকুলতল নামঘৰৰ পুনৰ প্ৰতিষ্ঠা দিৱসৰ লগত সংগতি ৰাখি আয়োজন কৰা ধৰ্মসভাত অংশগ্ৰহণ কৰি এই মন্তব্য কৰি বৰাই আৰু কয়- অসমৰ জনজীৱনৰ ৰূপান্তৰৰ খনিকৰ শংকৰদেৱ ।

অসমীয়া সংস্কৃতিৰ মহা সংগ্ৰামৰ প্ৰথম চিন "চিহ্নযাত্ৰা" । তেওঁ নামঘৰক একতাৰ স্থলী হিচাপে গ্ৰহণ কৰিবলৈ আহ্বান জনায় । ৰুণজুন বৰাই আঁতধৰা সভাখনত আনন্দৰাম ঢেকিয়াল ফুকন মহাবিদ্যালয়ৰ অধ্যাপক ড: সঞ্জীৱ বৰকাকতীয়ে শংকৰদেৱৰ জীৱন দৰ্শনৰ ওপৰত ব্যখ্যা দাঙি ধৰি কয়- অসমীয়া জাতিয়ে এতিয়াও শংকৰদেৱক ভালকৈ চিনিব পৰা নাই ।

তেওঁ লগতে কয়- শংকৰদেৱেই একমাত্ৰ ধৰ্ম প্ৰচাৰক যি জ্ঞানমাৰ্গ আৰু ভক্তিমাৰ্গ একত্ৰিত কৰিছিল । সভাতেই নামঘৰ পৰিচালনা সমিতিয়ে প্ৰকাশ কৰি উলিওৱা দুলু বৈদ্য সম্পাদিত স্মৃতিগ্ৰন্থ 'বকুল তলৰ সুবাস' উন্মোচন কৰে ময়ূৰ বৰা আৰু ড: সঞ্জীৱ বৰকাকতীয়ে ।

সভাত স্থানীয় বিশিষ্ট ব্যক্তি ভোলা শইকীয়া, বিচিত্ৰা শইকীয়া, হেমন্ত বৈদ্য, টংকেশ্বৰ বৈদ্য, টংকেশ্বৰৰ শইকীয়া আদি উপস্থিত থকে । পাঁচদিনীয়া কাৰ্যসূচীৰে অনুষ্ঠিত এই অনুষ্ঠান আজি ৰাসলীলা প্ৰদৰ্শনেৰে সামৰণি পৰে ।