সোণাইঘাট চলচলি মাদ্ৰাছাৰ ৰূপালী জয়ন্তী বৰ্ষৰ শুভাৰম্ভণী অনুষ্ঠান

নগাঁৱৰ পৰা ৱাহিদুদ জামান

নগাঁও জিলাৰ জুৰীয়াৰ সমীপৰ ঐতিহ্যমণ্ডিত সোণাইঘাট চলচলি হাফিজীয়া মাদ্ৰাছাৰ ২৫ বছৰ পূৰ্তি উপলক্ষে ৰূপালী জয়ন্তী বৰ্ষৰ শুভাৰম্ভণি অনুষ্ঠানৰ সোমবাৰে নিশা সামৰণি পৰে ।

তদুপলক্ষে সন্ধ্যা অনুষ্ঠিত মুকলি সভাত মাদ্ৰাছাখনৰ পৰা বিগত তিনি বছৰত হাফিজী ডিগ্ৰী লাভ কৰা মুঠ ২৫গৰাকী কৃতিমান ছাত্ৰক দস্তাৰবন্দী অৰ্থাৎ পাগুৰি, মানপত্ৰ প্ৰদান কৰা হয় ৷ কাৰ্যসূচী অনুসৰি, পুৱা ৬ বজাৰ পৰা স্বচ্ছতা অভিযান, পতাকা উত্তোলনৰ কাৰ্যসূচীৰ শুভাৰম্ভণি কৰে শিক্ষাবিদ মাইনুল হক আৰু সমাজকৰ্মী আব্দুল মতিন চৌধুৰীয়ে ৷

হাফিজ ৰফিকুল ইছলামে বিভিন্ন প্ৰতিযোগিতাৰ শুভাৰম্ভ কৰাৰ অন্তত দিনৰ ১০ বজাৰ পৰা আলহাজ ছৈয়দ আলীৰ সভাপতিত্বত বঁটা বিতৰণী সভা অনুষ্ঠিত হয় ৷ বিয়লি ২ বজাৰ পৰা শিক্ষাবিদ ফজলুল হক মৰলৰ সভাপতিত্বত অনুষ্ঠিত হয় মুকলি সভা ৷

মাদ্ৰাছাৰ উপ-সভাপতি তথা অভ্যৰ্থনা সমিতিৰ সম্পাদক মোস্তাফা কামালে আঁতধৰা আৰু উদ্দেশ্য ব্যখ্যা কৰা গাম্ভীৰ্যপূৰ্ণ সভাত শিক্ষাবিদ আবুল কাশেম, ডা: ফৰিদুল হোছেইন, ডা: মনিৰুল হক, হাফিজ নুৰুল হক, ডা: বাহাৰুল ইছলাম, সমাজকৰ্মী চাহাবুদ্দিন, মৌলানা মুহিবুল্লাহ কাচিমীকে ধৰি জিলাখনৰ বিভিন্ন স্তৰৰ বৰেণ্য ব্যক্তিসকলে অংশগ্ৰহণ কৰে ৷

সন্ধ্যা ৫ বজাৰ পৰা মোস্তাফা কামালৰ পৰিচালনাত আৰম্ভ হয় উৎসৱটিৰ মুল অনুষ্ঠান দস্তাৰবন্দী আৰু পাগুৰি প্ৰদান । এই অনুষ্ঠানত মুখ্য আৰু বিশিষ্ট অতিথি হিচাপে উপস্থিত থাকে হোজাই জালালীয়া মাদ্ৰাছাৰ মুহাদ্দিছ পাৰৱেজ আলম, মুফতী আ: ৰৌফ আৰু অসম বিখ্যাত সুৰকাৰী মোকাব্বিৰ হুছেইন ৷

মাদ্ৰাছাখনৰ ৰূপালী জয়ন্তী বৰ্ষৰ এই শুভাৰম্ভণি অনুষ্ঠানত জিলাখনৰ বিভিন্ন অনুষ্ঠান-প্ৰতিষ্ঠানৰ লগতে মুঠ ৬০গৰাকী অভিভাৱক আৰু বিশিষ্ট ব্যক্তিক সম্বৰ্ধনা জনোৱা হয় ৷ নিশা ৮ বজাৰ পৰা তেজপুৰৰ শিক্ষাবিদ মৌলানা নেকবৰ আলীৰ সুললি়ত কণ্ঠৰ ধাৰ্মিক ভাষণে উপস্থিত সহস্ৰাধিক ৰাইজক দুপৰ নিশালৈকে আপ্লুত কৰি তোলে ।