প্ৰাক্-নিৰ্বাচনী সমীকৰণত ব্যস্ত বটদ্ৰৱাৰ আইভেটী পঞ্চায়তৰ বিজেপিৰ শিবিৰ

নগাঁৱৰ পৰা ঋতুপৰ্ণ শৰ্মা

সমাগত পঞ্চায়ত নিৰ্বাচনৰ প্ৰতি লক্ষ্য ৰাখি নিৰ্বাচনী ৰণনীতিত নামি পৰিছে ৰাজনৈতিক দলসমূহ ৷ বটদ্ৰৱা সমষ্টিৰ ২৫নং আইভেটী পঞ্চায়তৰ বিজেপিৰ শিবিৰতো নিৰ্বাচনী সমীকৰণত ব্যস্ত হৈ পৰিছে দলীয় কৰ্মীসকল ৷

পূৰ্বে কংগ্ৰেছৰ দখলত থকা পঞ্চায়তটোত কৰি যোৱা দুৰ্নীতি নিৰ্মূল কৰাৰ লক্ষ্য আগত ৰাখি বিজেপি দলৰ পৰা পঞ্চায়ত সভাপতি পদৰ বাবে দেহীৰাম বৰাক প্ৰক্ষেপ কৰা হৈছে ৷

যুৱ শক্তিৰ সহযোগে বৰ্তমান সামাজিকভাৱে স্বচ্ছল ব্যক্তি দেহীৰাম বৰাই বৰ্তমান এক সবল স্থিতিত নিৰ্বাচনীৰ যুঁজত নামি পৰিছে ৷ ইফালে বিজেপি দলৰ বিপৰীতে নিৰ্বাচনী যু্ঁজত অৱতীৰ্ণ হৈছে পূৰ্বৰ ছাত্ৰ সন্থাৰ মজিয়াৰ পৰা আহি কংগ্ৰেছত যোগ দি পুনৰ জাতীয়তাবাদীৰ তেজেৰে মহীয়ান হৈ বৰ্তমান অসম গণ পৰিষদ দলৰ পৰা সভাপতি পদৰ বাবে প্ৰাৰ্থিত্ব আগবঢ়োৱা জগত শইকীয়াই ৷

ইয়াৰ বিপৰীতে আঞ্চলিকতাবাদৰ শিক্ষা লৈ অগপৰ পৰা পূৰ্বে আঞ্চলিক পঞ্চায়তৰ সদস্য হিচাপে জয়ী হৈ পিছত সেই শিক্ষাক বুঢ়া আঙুলি দেখুৱাই বৰ্তমান কংগ্ৰেছৰ আদৰ্শ শিৰত লৈ কংগ্ৰেছ দলৰ পৰা সভাপতি পদৰ বাবে প্ৰাৰ্থিত্ব আগবঢ়াইছে মিত্ৰদেৱ মহন্তই । এতিয়া প্ৰতিটো দলৰে নিৰ্বাচনী সমীকৰণ কাৰ সপক্ষে দেখা দিয়ে সেয়া সময়তহে লক্ষণীয় হ'ব । অপেক্ষা মাত্ৰ কেইটামান দিনৰ ।