মাজদিয়া আৰক্ষীৰ জালত গভাইত চোৰ

চেঙাৰ পৰা সুৰজিৎ পাঠক

বৰপেটা জিলাৰ সৰ্থেবাৰী আৰক্ষী থানাৰ অন্তৰ্গত পূব ছটলা গাঁৱত দেওবাৰে নিশা মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া ডিম্বেশ্বৰ পাঠকৰ নেতৃত্বত আৰক্ষীৰ দল এটাই অভিযান চলাই এটা গভাইত চোৰক আটক কৰিবলৈ সক্ষম হয় ।

আটক হোৱা চোৰটো পূব ছটলাৰ প্ৰয়াত জাফাৰ আলীৰ পুত্ৰ নজৰুল আলী (২০) বুলি জানিব পৰা গৈছে । গড়চুক আৰক্ষী থানাত ৰুজু হোৱা ৬৩০/১৮ নম্বৰ গোচৰ আৰু ভাৰতীয় দণ্ডবিধিৰ ৩৮১ ধাৰাৰ অধীনত নজৰুল আলীক মাজদিয়া আৰক্ষীয়ে গ্ৰেপ্তাৰ কৰি গড়চুক আৰক্ষী থানাক গতাই দিয়ে ।

গড়চুক আৰক্ষী থানাৰ সহঃউপ-পৰিদৰ্শক এছ হুছেইনে সংগীসহ মাজদিয়া আৰক্ষী চকীত উপস্থিত হৈ ধৃত নজৰুল আলীক চমজি লয় ।

ট্ৰাকৰ শ্ৰমিক হিচাপে কৰ্মৰত ধৃত নজৰুল আলীক ট্ৰাকভৰ্তি লোহা চুৰিৰ ঘটনাৰ লগত জড়িত থকাৰ অভিযোগত আৰক্ষীয়ে গ্ৰেপ্তাৰ কৰিছে বুলি জানিব পৰা গৈছে ।

ইতিমধ্যে গড়চুক আৰক্ষীয়ে চুৰি লোহা ক্ৰয় কৰাৰ অভিযোগত পূব ছটলাৰ নস্কৰ আলীৰ পুত্ৰ মহিৰুদ্দিন আহমেদকো গ্ৰেপ্তাৰ কৰিছে ।