তামুলপুৰৰ দ্বাৰকুছিৰ নমাইলত ভয়ংকৰ পথ দুৰ্ঘটনা : নিহত ১, আহত ৪

বাক্সা জিলাৰ তামুলপুৰ থানাৰ অন্তৰ্গত দ্বাৰকুছিৰ নমাইলত আজি সন্ধিয়া ৭ বজাত সংঘটিত হয় এক ভয়ংকৰ পথ দুৰ্ঘটনা । দুৰ্ঘটনাটোত এজন লোক নিহত আৰু আন চাৰিজন লোক গুৰুতৰভাৱে আহত হয় ।

নিহত লোকজন তামুলপুৰৰ খোপনিকুছিৰ সঞ্জয় বসুমতাৰী (২২) । ইপিনে দুৰ্ঘটনাটোত গুৰুতৰভাৱে আহত আন চাৰিজন যুৱক ক্ৰমে সাগৰ ৰামচিয়াৰী, হোছেইন আলী, মুক্তাৰ আলী আৰু অহেদ আলী ।

জানিব পৰামতে, ভাৰত-ভূটান আন্তঃৰাষ্ট্ৰীয় ঘাইপথৰ দ্বাৰকুছিৰ নমাইলত ৰঙিয়া অভিমুখী এখন তীব্ৰবেগী বাছে এখন বাইক (এ এছ-২৫ কে ৪১৫১) আৰু স্কুটী (এ এছ-১৪ এইছ ৭৪১৩)ক খুন্দিয়াই বহুদূৰ মহতিয়াই লৈ যায় ।

গুৰুতৰভাৱে আহত লোককেইজনক স্থানীয় ৰাইজ আৰু আৰক্ষীৰ সহযোগত ৰঙিয়া অসামৰিক চিকিৎসালয়ত ভৰ্তি কৰোৱাত চিকিৎসকে সঞ্জয়ক মৃত বুলি ঘোষণা কৰে আৰু চাৰিজনক উন্নত চিকিৎসাৰ বাবে গুৱাহাটীলৈ প্ৰেৰণ কৰে ।

দুৰ্ঘটনা সংঘটিত কৰিয়েই বাছখনে পলায়ন কৰে বুলি জানিব পৰা গৈছে ।