হোজাই জিলা অগপৰ সভাপতিৰ দায়িত্ব পুনৰ ৰেজাউল কৰিম চৌধুৰীক

ডবকাৰ পৰা জমিৰ উদ্দিন তালুকদাৰ

পঞ্চায়ত নিৰ্বাচনলৈ মাজত মাথোঁ কেইটামান দিন বাকী অৱস্থাত হোজাই জিলা অগপৰ সভাপতিক লৈ এক বিতৰ্কৰ সৃষ্টি হৈছিল ৷ পূৰ্বৰ সভাপতি ৰেজাউল কৰিম চৌধুৰী কেইদিনমান সাংগঠনিক কাম-কাজত অনুপস্থিত থকাত তেওঁৰ স্থানত জিলা অগপৰ উপ-সভাপতি ছাদিকুল্লাহ ভূঞাক ভাৰপ্ৰাপ্ত সভাপতিৰ দায়িত্ব দিয়া হৈছিল ৷

পঞ্চায়ত নিৰ্বাচনৰ দিন চমু চাপি অহাৰ লগে লগে ৰেজাউল কৰিম চৌধুৰী জিলাখনৰ ৰাজনীতিত পুনৰ সক্ৰিয় হৈ পৰিছে ৷ ইতিমধ্যে পঞ্চায়ত নিৰ্বাচনৰ প্ৰতি লক্ষ্য ৰাখি ৰেজাউল কৰিম চৌধুৰীৰ নেতৃত্বত হোজাই জিলা অগপই সাংগঠনিক তৎপৰতাও আৰম্ভ কৰিছে ৷ ঠায়ে ঠায়ে প্ৰাৰ্থী বাছনিৰ লগতে কংগ্ৰেছ আৰু এ আই ইউ ডি এফক প্ৰত্যাহ্বান জনাবলৈ শক্তিশালী প্ৰাৰ্থী থিয় কৰোৱাৰ কুচকাৱাজ চলাইছে ৷

যমুনামুখ সমষ্টিত সবল গণভিত্তি থকা ৰেজাউল কৰিম চৌধুৰীক পুনৰ হোজাই জিলা অগপৰ সভাপতিৰ দায়িত্ব দিয়া হৈছে ৷ দলৰ সাধাৰণ সম্পাদক কমলা শইকীয়া স্বাক্ষৰিত এক নিৰ্দেশযোগে ছাদিকুল্লাহ ভূঞাৰ ঠাইত পূৰ্বৰ সভাপতি ৰেজাউল কৰিম চৌধুৰীক হোজাই জিলা অগপৰ সভাপতিৰ দায়িত্ব দিয়া হয় ৷

দলৰ কেন্দ্ৰীয় সমিতিৰ এই সিদ্ধান্তই উৎফুল্লিত কৰি তুলিছে দলীয় কৰ্মী-সমৰ্থকক ৷ ৰেজাউল কৰিমক পুনৰ হোজাই জিলা অগপৰ সভাপতিৰ দায়িত্ব অৰ্পণ কৰাত উৎফুল্লিত হৈ পৰিছে জিলাখনৰ অগপ কৰ্মীসকল ৷

ইয়াতে উল্লেখ কৰা প্ৰয়োজন যে হোজাই জিলাত ইতিমধ্যে দলটোৱে পঞ্চায়ত নিৰ্বাচনৰ বাবে ব্যাপক তৎপৰতা আৰম্ভ কৰিছে ৷