বঙাইগাঁও-মাণিকপুৰ মহকুমাত পঞ্চায়ত নিৰ্বাচনৰ যাৱতীয় ব্যৱস্থা গ্ৰহণ

অসম পঞ্চায়ত বিধি, ১৯৯৫ৰ ১৬ নং বিধি অনুসৰি অসমৰ অন্যান্য জিলাৰ লগতে বঙাইগাঁৱতো তিনি তৰপীয়া পঞ্চায়তৰ সভাপতি তথা সদস্য নিৰ্বাচিত কৰাৰ বাবে জিলা প্ৰশাসনে যাৱতীয় ব্যৱস্থা হাতত লৈছে ৷ বঙাইগাঁও সদৰ মহকুমা আৰু মাণিকপুৰ মহকুমাত পঞ্চায়ত নিৰ্বাচন অনুষ্ঠিত হ'ব ৯ ডিচেম্বৰত ৷

সেই অনুসৰি ডাংতল উন্নয়ন খণ্ডৰ অধীনৰ ১৬খন গাঁও পঞ্চায়ত আৰু মাণিকপুৰ উন্নয়ন খণ্ডৰ অধীনৰ ১২খন গাঁও পঞ্চায়তৰ সদস্য নিৰ্বাচনৰ বাবে সংশ্লিষ্ট উন্নয়ন খণ্ডৰ খণ্ড উন্নয়ন বিষয়াৰ কাৰ্যালয়ৰ পৰা মনোনয়ন-পত্ৰসমূহ নিৰ্বাচনত প্ৰতিদ্বন্দ্বিতা কৰিব খোজা প্ৰাৰ্থীসকলে সংগ্ৰহ কৰিব পাৰিব ৷

সংগ্ৰহ কৰা মনোনয়ন-পত্ৰসমূহ সংশ্লিষ্ট উন্নয়ন খণ্ডৰ খণ্ড উন্নয়ন বিষয়াৰ কাৰ্যালয়ত অহা ১৯ নৱেম্বৰলৈ কাৰ্যালয় খোলা দিনত (চৰকাৰী বন্ধৰ বাহিৰে) পুৱা ১১ বজাৰ পৰা বিয়লি ৩ বজাৰ ভিতৰত প্ৰাৰ্থীয়ে নিজে বা তেওঁৰ প্ৰস্তাৱকে প্ৰাধিকৃত বিষয়াৰ হাতত জমা দিব পাৰিব ৷

জমা দিয়া মনোনয়ন-পত্ৰসমূহ ২০ নৱেম্বৰৰ পুৱা ১০.৩০ বজাত খণ্ড উন্নয়ন বিষয়াৰ কাৰ্যালয়ত পৰীক্ষা কৰা হ'ব ৷ আনহাতে, ২২ নৱেম্বৰত খণ্ড উন্নয়ন বিষয়া বা প্ৰাধিকৃত বিষয়াৰ হাতত ৩ বজালৈকে প্ৰাৰ্থীয়ে নিজে বা তেওঁৰ প্ৰস্তাৱকে প্ৰাৰ্থিত্ব প্ৰত্যাহাৰৰ জাননী দাখিল কৰিব পাৰিব ৷ নিৰ্বাচনত প্ৰতিদ্বন্দ্বিতা হ'লে ৯ ডিচেম্বৰৰ পুৱা ৭ বজাৰ পৰা বিয়লি ৩ বজালৈ ভোট গ্ৰহণ কেন্দ্ৰত ভোট গ্ৰহণ কৰা হ'ব ৷

সেইদৰে বঙাইগাঁও জিলা পৰিষদৰ সমষ্টিসমূহৰ বিপৰীতে সাতজন সদস্য নিৰ্বাচিত কৰাৰ বাবে মনোনয়ন-পত্ৰসমূহ প্ৰাৰ্থীয়ে বঙাইগাঁও জিলা উপায়ুক্ত কাৰ্যালয়ৰ পৰা সংগ্ৰহ কৰিব পাৰিব ৷ ডাংতল আঞ্চলিক পঞ্চায়তৰ অধীনৰ ১৬খন গাঁও পঞ্চায়তৰ সভাপতি নিৰ্বাচিত কৰাৰ বাবে প্ৰাৰ্থীয়ে মনোনয়ন-পত্ৰসমূহ জিলা উপায়ুক্ত কাৰ্যালয়ৰ পৰা সংগ্ৰহ কৰিব পাৰিব আৰু একেই কাৰ্যালয়ত জমা দিব পাৰিব ৷

আকৌ ডাংতল আঞ্চলিক পঞ্চায়তলৈ ইয়াৰ অন্তৰ্গত এলেকাৰ পৰা ১৬জন সদস্য নিৰ্বাচিত কৰাৰ বাবে প্ৰাৰ্থীসকলে বঙাইগাঁও জিলা উপায়ুক্ত কাৰ্যালয়ৰ পৰা মনোনয়ন-পত্ৰসমূহ সংগ্ৰহ কৰি একেটা কাৰ্যালয়তে জমা দিব পাৰিব ৷

আনহাতে, মাণিকপুৰ আঞ্চলিক পঞ্চায়তলৈ ইয়াৰ অন্তৰ্গত এলেকাৰ পৰা ১২জন সদস্য নিৰ্বাচিত কৰাৰ বাবে প্ৰাৰ্থীসকলেও বঙাইগাঁও জিলা উপায়ুক্ত কাৰ্যালয়ৰ পৰা মনোনয়ন-পত্ৰ সংগ্ৰহ কৰি একেটা কাৰ্যালয়তে জমা দিব পাৰিব ৷

উল্লেখ্য যে জিলা পৰিষদ, আঞ্চলিক পঞ্চায়ত তথা গাঁও পঞ্চায়তৰ সদস্য আৰু সভাপতি নিৰ্বাচনৰ সময়সূচী গাঁও পঞ্চায়তৰ সদস্য নিৰ্বাচনৰ সময়সূচীৰ লগত একেই ৷