ইউ পি পি এলৰ সাধাৰণ সম্পাদক হিচাপে মাওটি ব্ৰহ্ম হাজোৱাৰীৰ কাৰ্যভাৰ গ্ৰহণ

যোৱা ৩ নৱেম্বৰত বিটিচিৰ আগশাৰীৰ ৰাজনৈতিক দল ইউ পি পি এলৰ এখন কেন্দ্ৰীয় কাৰ্যনিৰ্বাহক সভা মুছলপুৰত অনুষ্ঠিত হয় ৷ উক্ত সভাত নতুন কাৰ্যনিৰ্বাহক সমিতিখনে কাৰ্যভাৰ গ্ৰহণ কৰে ৷

উক্ত সভাতে নতুন সাধাৰণ সম্পাদক মাওটি ব্ৰহ্ম হাজোৱাৰীয়েও কাৰ্যভাৰ গ্ৰহণ কৰে ৷ শপতগ্ৰহণ অনুষ্ঠানটি পৰিচালনা কৰে দলৰ সভাপতি ইউ জি ব্ৰহ্মই ৷ সভাত যোৱা ১ নৱেম্বৰত ধলাত সংঘটিত নাৰকীয় হত্যাকাণ্ডৰ তীব্ৰ নিন্দা কৰাৰ লগতে হত্যাকাণ্ডক গৰিহণা দিয়ে ৷ হত্যাকাৰীৰ বিৰুদ্ধে কঠোৰ শাস্তিৰো দাবী জনায় সভাই ৷

আনহাতে, অসমৰ সৰ্বস্তৰৰ জনসাধাৰণক শান্তি-সম্প্ৰীতি অটুট ৰাখিবলৈও দলটোৱে আহ্বান জনায় ৷উল্লেখ্য যে মাওটি ব্ৰহ্মৰ নেতৃত্বত জিলাভিত্তিক ভ্ৰমণৰ বাবে এখন শক্তিশালী সমিতি গঠন কৰা হয় ৷

সমিতিখনত আছে ইউ পি পি এলৰ যুৱ শাখাৰ সভাপতি সোমনাথ নাৰ্জাৰী, অনুসূচিত জাতি কোষৰ সভাপতি নাৰায়ণ মজুমদাৰ, সংখ্যালঘু কোষৰ সভাপতি হানিফ আলী আৰু মহিলা শাখাৰ সভানেত্ৰী বিনা গয়াৰী ৷

কেন্দ্ৰীয় কাৰ্যনিৰ্বাহক সভাতে আগন্তুক পঞ্চায়ত নিৰ্বাচনৰ প্ৰাৰ্থীৰ তালিকা প্ৰস্তুতৰ সিদ্ধান্ত গ্ৰহণ কৰা হয় ৷ আনহাতে, আগন্তু লোকসভা নিৰ্বাচনৰ বাবেও জিলা সমিতিসমূহক প্ৰস্তুত হ'বলৈ আহ্বান জনায় ৷