বল্লভ ভাই পেটেলৰ জন্ম দিনত 'একতাৰ দৌৰ’ আয়োজন গোলাঘাট জিলা বিজেপিৰ

গোলাঘাটৰ পৰা মীনাক্ষী ফুকন

সমগ্ৰ দেশৰ লগতে গোলাঘাট নগৰতো ভাৰতৰ প্ৰাক্তন গৃহমন্ত্ৰী, লৌহ মানৱ চৰ্দাৰ বল্লভভাই পেটেলৰ ১৪২সংখ্যক জন্মদিৱস উপলক্ষে গোলাঘাট জিলা ভাৰতীয় জনতা পাৰ্টীৰ উদ্যোগত আৰু নগৰ মণ্ডল সমিতিৰ সহযোগত অহা ৩১ নৱেম্বৰত 'ৰাণ ফৰ ইউনিটী' শীৰ্ষক এক সামূহিক দৌৰ কাৰ্যসূচীৰ আয়োজন কৰা হৈছে ।

গোলাঘাটৰ ৰাজহুৱা খেলপথাৰৰ পৰা পুৱা ৭ বজাত আৰম্ভ হ’বলগা উক্ত কাৰ্যসূচীত গোলাঘাটৰ বিভিন্ন দল-সংগঠন, বিশিষ্ট নাগৰিক, ক্ৰীড়াবিদ, সাংস্কৃতিক কৰ্মী তথা বিজেপিৰ কাৰ্যকৰ্তা আৰু শুভাকাংক্ষীসকলে অংশগ্ৰহণ কৰিব ৷

এই সামূহিক দৌৰৰ আনুষ্ঠানিক উদ্বোধন কৰিব গোলাঘাটত জিলা বিজেপিৰ সভাপতি দেৱজিত বৰাই আৰু ’ফ্লেগ অফ্‌’ কৰিব খুমটাই সমষ্টিৰ বিধায়ক মৃণাল কুমাৰ শইকীয়াই ৷

একতাৰ শপত বাক্য পাঠ কৰাব ৰাজ্যিক বিজেপিৰ সম্পাদক দেৱপ্ৰদীপ বৰাই ৷ অসম চাহ নিগমৰ অধ্যক্ষ অমিয় কুমাৰ বৰা, ৰাজ্যিক সদস্য ডঃ মৃদুল কুমাৰ দত্ত আদি জ্যেষ্ঠ নেতাসকল এই কাৰ্যসূচীত উপস্থিত থাকিব ।

এই কাৰ্যসূচী সূচাৰুৰূপে ৰূপায়ণ কৰিবৰ বাবে জিলা বিজেপিৰ সম্পাদক সঞ্জীৱ দাসক কাৰ্যক্ৰম প্ৰমুখ হিচাপে সভাপতি দেৱজিত বৰাই দায়িত্ব অৰ্পণ কৰে ।

গোলাঘাটৰ লগতে বোকাখাত, সৰুপথাৰ আৰু দেৰগাঁৱত আয়োজন কৰা সামূহিক দৌৰ কাৰ্যসূচীত গোলাঘাট জিলাৰ সকলো জনসাধাৰণৰ সহযোগিতা জিলা বিজেপিয়ে কামনা কৰা বুলি সংবাদ বিভাগৰ আহ্বায়ক জয়ন্ত কুমাৰ গোস্বামীয়ে জানিবলৈ দিয়ে ।